ପ୍ୟାରିସ୍: ଚେକ୍ ଗଣରାଜ୍ୟ ତରୁଣୀ ବାର୍ବୋରା କ୍ରେସିକୋଭା ପ୍ରଥମ ଗ୍ରାଣ୍ଡସ୍ଲାମ ଟ୍ରଫି ବିଜୟୀ ହୋଇଛନ୍ତି। ବର୍ଷର ଦ୍ବିତୀୟ ଗ୍ରାଣ୍ଡସ୍ଲାମ ଫ୍ରେଞ୍ଚ ଓପନ ମହିଳା ସିଙ୍ଗଲ୍ସ ବିଭାଗରେ ଚମ୍ପିଆନ ଆଖ୍ୟା ଅର୍ଜନ କରିଛନ୍ତି ବାର୍ବୋରା କ୍ରେସିକୋଭା। ଶନିବାର ରୋଲାଣ୍ଡ ଗାରୋସ୍ରେ ଖେଳାଯାଇଥିବା ମହିଳା ସିଙ୍ଗଲ୍ସର ସଂଘର୍ଷପୂର୍ଣ୍ଣ ଫାଇନାଲରେ କ୍ରେସିକୋଭା ୬-୧, ୨-୬ ଓ ୬-୪ ସେଟ୍ରେ ରୁଷିଆର ଆନାସ୍ତାସିଆ ପାଭଲ୍ୟୁଚେଙ୍କୋଭାଙ୍କୁ ପରାସ୍ତ କରି କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ ଟ୍ରଫି ହାସଲ କରିଛନ୍ତି। ଗ୍ରାଣ୍ଡସ୍ଲାମ ଇତିହାସରେ ପ୍ରଥମ ଥର ପାଇଁ ମହିଳା ସିଙ୍ଗଲ୍ସରେ ଶୀର୍ଷସ୍ତରୀୟ ଖେଳାଳିଙ୍କ ବିନା ଫାଇନାଲ ମ୍ୟାଚ ଦେଖିବାକୁ ମିଳିଥିଲା।
ବିଶ୍ବ ମାନ୍ୟତାର ୩୨ତମ ସ୍ଥାନରେ ଥିବା ପାଭଲ୍ୟୁଚେଙ୍କୋଭା ଓ ୩୩ତମ ମାନ୍ୟତାପ୍ରାପ୍ତ ଚେକ୍ ଗଣରାଜ୍ୟର ବାର୍ବୋରା କ୍ରେସିକୋଭା ପ୍ରଥମ ଥର ପାଇଁ ଗ୍ରାଣ୍ଡସ୍ଲାମ ଫାଇନାଲକୁ ଓହ୍ଲାଇଥିଲେ। ପ୍ରଥମ ଗ୍ରାଣ୍ଡସ୍ଲାମ ଟ୍ରଫି ବିଜୟ ପାଇଁ ଦୁଇ ଖେଳାଳି ଦୁଇଘଣ୍ଟା ପାଖାପାଖି କୋର୍ଟରେ ସଂଘର୍ଷ କରିଥିଲେ। ୨୫ ବର୍ଷୀୟା କ୍ରେସିକୋଭା ପ୍ରଥମ ସେଟ୍କୁ ୬-୧ରେ ଜିତି ନେଇଥିଲେ। ଦ୍ବିତୀୟ ସେଟ୍ରେ ପାଭଲ୍ୟୁଚେଙ୍କୋଭା ପ୍ରତ୍ୟାବର୍ତ୍ତନ କରିବା ସହ ୬-୨ରେ ଜିତି ମ୍ୟାଚକୁ ଫେରିଥିଲେ। ତୃତୀୟ ସେଟ୍ କଡା ସଂଘର୍ଷପୂର୍ଣ୍ଣ ହୋଇଥିଲା। ଏଥିରେ କ୍ରେସିକୋଭା ୬-୪ ସେଟ୍ରେ ବିଜୟୀ ହୋଇଥିଲେ। ପୂର୍ବରୁ କ୍ରେସିକୋଭା ୨୦୧୭ରେ ୱିମ୍ବିଲଡନ, ୨୦୧୪ରେ ୟୁଏସ୍ ଓପନର କ୍ବାର୍ଟର ଫାଇନାଲରେ ପ୍ରବେଶ କରିଥିଲେ। ଯାହା ଗ୍ରାଣ୍ଡସ୍ଲାମ ମହିଳା ସିଙ୍ଗଲ୍ସ ବିଭାଗର ଶ୍ରେଷ୍ଠ ପ୍ରଦର୍ଶନ ରହିଥିଲା।
