ବରଗଡ଼: ବରଗଡ଼ ଟ୍ରାକ୍ଟର ମାଲିକ ସଂଘର ଏକ ପ୍ରତିନିଧି ମଣ୍ଡଳୀ ବୁଧବାର ସଂଘର ଉପଦେଷ୍ଟା ଆଇନଜୀବୀ ନିପନ ଦାଶ ଓ ଲିପସିତ୍ ମିଶ୍ରଙ୍କ ନେତୃତ୍ଵରେ ବରଗଡ଼ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନଙ୍କୁ ସାକ୍ଷାତ କରି ବରଗଡ଼ ସହର ତଥା ଏହାର ଆଖପାଖ ଅଞ୍ଚଳରେ ଟ୍ରାକ୍ଟର ମାଲିକ ମାନେ ବାଲି ଉଠାଇବା ନେଇ ସମ୍ମୁଖୀନ ହେଉଥିବା ସମସ୍ୟା ସଂପର୍କରେ ବିଷଦ୍ ଆଲୋଚନା କରିଥିଲେ।
ଏଠାରେ ଉଲ୍ଲେଖଯୋଗ୍ୟ ଯେ, ବିଗତ କିଛି ଦିନ ହେଲା ବରଗଡ଼ ପୁଲିସ ବେଆଇନ୍ ବାଲି ଉଠାଣ ନେଇ ବିଗତ କିଛି ଦିନ ହେଲା ବରଗଡ଼ ପୁଲିସ ବ୍ୟାପକ ଧରପଗଡ କରୁଅଛି। ଏପରିକି ଟ୍ରାକ୍ଟର ଡ୍ରାଇଭର ମାନଙ୍କ ପ୍ରତି ପେଷାଦାର ଅପରାଧୀ ଭଳିଆ ବ୍ୟବହାର କରୁଛି। ଟ୍ରାକ୍ଟର ମାନେ ଲିଜଧାରୀଙ୍କ ବାଲି ଘାଟରୁ ବାଲି ଉଠାଣ କରୁଥିଲେ ମଧ୍ୟ ପୁଲିସ ତାଙ୍କୁ ଅଟକ ରଖି ଜୋରିମାନା ଆଦାୟ କରୁଥିବା ଅଭିଯୋଗ ହୋଇଥିଲା। ଅନ୍ୟ ପକ୍ଷରେ ଜିଲ୍ଲାର ଅନ୍ୟ ଅଞ୍ଚଳରୁ ବଡବଡ ହାଇୱା ଯୋଗେ ଶହ ଶହ ଟ୍ରିପ ବାଲି ଚାଲାଣ ହେଉଥିଲେ ମଧ୍ୟ କେବଳ ଟ୍ରାକ୍ଟର ମାନଙ୍କୁ ହଇରାଣ କରାଯାଉଥିବା ଅଭିଯୋଗ ହୋଇଥିଲା। ଗୋଟିଏ ଗୋଟିଏ ଟ୍ରାକ୍ଟରରେ ଅନୁନ୍ୟ ଚାରିରୁ ପାଞ୍ଚ ଗୋଟି ପରିବାର ନିର୍ଭରଶୀଳ ରହିଥାନ୍ତି। ଯଦି ଏଭଳି ଜୁଲୁମ ଜାରି ରହିବ ତାହା ହେଲେ ସହସ୍ରାଧିକ ପରିବାର ରୋଜଗାର ରୁ ବଞ୍ଚିତ ହେବେ ବୋଲି ପ୍ରତିନିଧି ମଣ୍ଡଳୀ ଜିଲ୍ଲାପାଳଙ୍କୁ ଅବଗତ କରାଇଥିଲେ। ଆହୁରି ମଧ୍ୟ ଅନେକ ମାଲିକ ବ୍ୟାଙ୍କରୁ ଋଣ ନେଇ ଟ୍ରାକ୍ଟର ବ୍ୟବସାୟ କରୁଥିବାରୁ ସେମାନେ ମଧ୍ୟ କ୍ଷତିଗ୍ରସ୍ତ ହେବାର ଆଶଙ୍କା ରହିଛି। ଜିଲ୍ଲାପାଳ ଶୀଘ୍ର ଲିଜଧାରୀ ମାନଙ୍କର ପରିବେଶ ବିଭାଗର ମଞ୍ଜୁରି ମିଳିଯିବ ଏବଂ ବର୍ତ୍ତମାନ ପରିସ୍ଥିତିରେ ଟ୍ରାକ୍ଟର ମାଲିକ ମାନଙ୍କୁ ହଇରାଣ କରାଯିବ ନାହିଁ ବୋଲି ପ୍ରତିଶ୍ରୁତି ଦେଇଥିଲେ।
