ନୂଆଦିଲ୍ଲୀ: ଦିନକୁ ଦିନ ବଢ଼ୁଛି ବ୍ୟାଙ୍କିଂ ଠକେଇ । ସରକାରଙ୍କ ସମସ୍ତ ଉଦ୍ୟମ ସତ୍ତ୍ବେ ବ୍ୟାଙ୍କିଂ ଠକେଇକୁ ରୋକାଯାଇ ପାରୁନାହିଁ । ଫଳରେ ବ୍ୟାଙ୍କ ଗୁଡ଼ିକ ଅନେକ କ୍ଷତି ସହୁଛନ୍ତି । ଦେଶର ସମସ୍ତ ରାଜ୍ୟରେ ଏପରି ଘଟଣା ସାମ୍ନାକୁ ଆସୁଛି । ସବୁଠାରୁ ବଡ଼ କଥା ହେଉଛି ଏହି ଠକେଇରେ ସର୍ବ ପ୍ରଥମେ ରହିଛି ମହାରାଷ୍ଟ୍ର । ମହାରାଷ୍ଟ୍ରର ବ୍ୟାଙ୍କ ଗୁଡ଼ିକରେ ସର୍ବାଧିକ ଠକେଇ ହୋଇଥିବା ସୂଚନା ଦେଇଛି ଆରବିଆଇ ।
ରିଜର୍ଭ ବ୍ୟାଙ୍କର ଏକ ରିପୋର୍ଟ ଅନୁସାରେ ଗତ ୭ ବର୍ଷ ମଧ୍ୟରେ ଦେଶରେ ମାତ୍ରାଧିକ ଠକେଇ ହୋଇଛି । ଠକେଇ ଯୋଗୁ ଦେଶରେ ଦୈନିକ ୧୦୦ କୋଟି ଟଙ୍କା କ୍ଷତି ହୋଇଛି । ବ୍ୟାଙ୍କିଂ ଠକେଇ ଯୋଗୁ ସବୁଠାରୁ ଅଧିକ ମହାରାଷ୍ଟ୍ର କ୍ଷତି ସହିଛି ବୋଲି କହିଛି ଆରବିଆଇ । ମହାରାଷ୍ଟ୍ରରେ ପ୍ରାୟ ୫୦% ବ୍ୟାଙ୍କ ସ୍କାମ ହୋଇଥିବା କୁହାଯାଇଛି ।
ବ୍ୟାଙ୍କ ଠକେଇରେ ମହାରାଷ୍ଟ୍ର ପ୍ରଥମ ସ୍ଥାନରେ ଥିବା ବେଳେ ଦ୍ବିତୀୟ ସ୍ଥାନରେ ରହିଛି ରାଜଧାନୀ ନୂଆଦିଲ୍ଲୀ । ପରେ ପରେ ତେଲେଙ୍ଗାନା, ଗୁଜୁରାଟ ଏବଂ ତାମିଲନାଡୁରେ ଠକେଇ ହୋଇଛି । ଗତ ସାତ ବର୍ଷ ମଧ୍ୟରେ ଏହି ୫ଟି ରାଜ୍ୟରେ ୨ ଲକ୍ଷ କୋଟି ଟଙ୍କାରୁ ଅଧିକ ବ୍ୟାଙ୍କିଂ ସ୍କାମ ହୋଇଛି । ଏହା ସ୍କାମର ମୋଟ ପରିମାଣର ୮୩ ପ୍ରତିଶତ ଅଟେ ।
