ନୂଆଦିଲ୍ଲୀ: ସାକ୍ଷ୍ୟ ଦେବା ପାଇଁ କୋର୍ଟରେ ପହଞ୍ଚିଲେ ପରିଣାମ ଭୟଙ୍କର ହେବ। ଉନ୍ନାଓ ଘଟଣାଠାରୁ ଆହୁରି ଭୟଙ୍କର ହେବ ବୋଲି ଜଣେ ଦୁଷ୍କର୍ମ ପୀଡିତାଙ୍କୁ ଧମକ ମିଳିଛି। ପ୍ରାୟ ଏକ ବର୍ଷ ପୂର୍ବେ ଗଣ ଦୁଷ୍କର୍ମର ଶିକାର ହୋଇଥିବା ପୀଡିତାଙ୍କ ଘର ଦୁଆର ମୁହଁ କାନ୍ଥରେ ଏଭଳି ଏକ ଧମକପୂର୍ଣ୍ଣ ପୋଷ୍ଟର ଲଗା ଯାଇଥିବା ଦେଖିବାକୁ ମିଳିଛି। ଏହାକୁ ନେଇ ପୀଡିତାଙ୍କ ପରିବାର ଭୟବୀତ ଅବସ୍ଥାରେ ରହିଛନ୍ତି। ପୁଲିସ ଏହାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଛି।
ସୂଚନାଯୋଗ୍ୟ, ଦିଲ୍ଲୀରେ ଏସଏସସି କୋଚିଂ ନେଉଥିବା ଜଣେ ଛାତ୍ରୀ ୨୦୧୮ ଜୁଲାଇରେ ଗଣଦୁଷ୍କର୍ମର ଶିକାର ହୋଇଥିଲେ। ଦିଲ୍ଲୀ ମୁଖାର୍ଜୀ ନଗର ଥାନାରେ ଏନେଇ ଏକ ମାମଲା ରୁଜୁ ହୋଇଥିଲା। ଏହି ମାମଲାରେ ପୁଲିସ ତିନି ଜଣ ଅଭିଯୁକ୍ତଙ୍କୁ ଗିରଫ କରି ଜେଲକୁ ପଠାଇଥିଲା ସତ ହେଲେ ସେମାନେ ଏବେ ଜାମିନରେ ଆସି ବାହାରେ ବୁଲୁଛନ୍ତି। ଏହି ମାମଲାରେ ସାକ୍ଷ୍ୟ ଦେବା ପାଇଁ ଡିସେମ୍ବର ୧୩ରେ ପୀଡିତା ଜଣଙ୍କ ଦିଲ୍ଲୀ ହଜାରୀ କୋର୍ଟରେ ହାଜର ହେବେ। ହେଲେ ତା’ ପୂର୍ବରୁ ପୀଡିତାଙ୍କୁ ଏହି ଧମକ ମିଳିଛି। ଯଦି ସେ କୋର୍ଟରେ ହାଜର ହୋଇ ସାକ୍ଷ୍ୟ ଦିଅନ୍ତି ତେବେ ତାଙ୍କ ଅବସ୍ଥା ଉନ୍ନାଓ ଘଟଣାଠାରୁ ଆହୁରି ଭୟଙ୍କର ହେବ ବୋଲି ପୋଷ୍ଟରରେ ଧମକ ଦିଆଯାଇଛି। ବୁଧବାର ସକାଳେ ପୀଡିତାଙ୍କ ପରିବାର ଏହି ପୋଷ୍ଟର ଦେଖି ଭୟବୀତ ହୋଇ ପଡିଛନ୍ତି ଏବଂ ସୁରକ୍ଷା ପାଇଁ ଦାବି କରିଛନ୍ତି।
ଅନ୍ୟ ପକ୍ଷରେ ସ୍ଥାନୀୟ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି। କିଏ ଏହି ପୋଷ୍ଟର ଲଗାଇଛି ତାହା ଜାଣିବାକୁ ପୁଲିସ ଛାନଭିନ୍ ଚଳାଇଛି। ଡିସେମ୍ବର ୧୩ରେ ପୀଡିତା ଜଣଙ୍କ କୋର୍ଟକୁ ଯିବା ସମୟରେ ପୁଲିସ ପକ୍ଷରୁ ସୁରକ୍ଷା ପ୍ରଦାନ କରାଯିବ ବୋଲି କୋତୱାଲି ଥାନା ଅଧିକାରୀ ଆର.କେ ସିଂହ କହିଛନ୍ତି।
