ମହାରାଷ୍ଟ୍ର: କଲକାତା ଲଜ୍ଜା ଦେଶରେ ଥମି ନଥିବା ବେଳେ ଏବେ ମହାରାଷ୍ଟ୍ର ବଦଲାପୁରରେ ଲଜ୍ଜାଜନକ ଘଟଣା ଘଟିଛି। ସ୍କୁଲରେ ଶିଶୁକନ୍ୟାଙ୍କୁ ଅସଦାଚରଣ ନେଇ ଅଭିଯୋଗ ପରେ ଜୋରଦାର ବିକ୍ଷୋଭ କରିଛନ୍ତି ଶତାଧିକ ଅଭିଭାବକ। ରେଳ ରୋକ କରିବା ସହିତ ପୁଲିସ ଉପରକୁ ପଥର ମାଡ କରିଛନ୍ତି ଉପସ୍ଥିତ ଜନତା। ସୂଚନା ଅନୁସାରେ ବଦଲାପୁରରେ ଥିବା ଏକ ସ୍କୁଲରେ ନର୍ସରୀରେ ପଡୁଥିବା ଜଣେ ଶିଶୁକନ୍ୟା ସହିତ ଅସଦାଚରଣ ନେଇ ଜୋରଦାର ବିକ୍ଷୋଭ ପ୍ରଦର୍ଶନ କରାଯାଇଛି। ଶିଶୁକନ୍ୟା ସହିତ ଏଭଳି ଘଟଣା ୧୪ ଅଗଷ୍ଟ ଦିନ ଘଟିଥିବା ଜଣାପଡିଛି। ପୀଡିତାଙ୍କ ପରିବାର ଘଟଣା ସମ୍ପର୍କରେ ଜାଣିବା ପରେ ସ୍କୁଲ ବିରୋଧରେ ମାମଲା ରୁଜୁ କରିବାକୁ ଯାଇଥିବା ବେଳେ କୌଣସି ସହଯୋଗ ମିଳିନଥିଲା। ଘଟଣା ପରେ ସ୍କୁଲ ପ୍ରଶାସନ ପକ୍ଷରୁ ସ୍କୁଲର ଅଧ୍ୟକ୍ଷ, ଶିକ୍ଷକ ଏବଂ ମହିଳା ଆଟେଡାଣ୍ଟଙ୍କୁ ନିଲମ୍ବିତ କରାଯାଇଛି। ସିସିଟିଭି ଫୁଟେଜ ଯାଞ୍ଚ କରିବା ସହ କର୍ମଚାରୀ ମାନଙ୍କୁ ପଚରାଉଚରା କରିଛି ପୁଲିସ। ଏହାପରେ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇବା ସହ ଲୋକମାନେ ଆଜି ଧାରଣା ଦେଇ ରେଳ ରୋକ କରିଥିଲେ। ଉତ୍ତେଜନାକୁ ଦୃଷ୍ଟିରେ ରଖି ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଛି। ସ୍ଥାନୀୟ ପୁଲିସ ଏହି ଘଟଣାରେ ସ୍କୁଲ ଆଟେଡାଣ୍ଟ ଅକ୍ଷୟ ସିନ୍ଦେଙ୍କୁ ଗିରଫ କରିଛି।
Comments are closed.