ଡେସ୍କ: ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଦିଆ ଆଜି ଅଯୋଧ୍ୟା ଓ ଅହମ୍ମଦାବାଦ ମଧ୍ୟରେ ପ୍ରତ୍ୟକ୍ଷ ବିମାନ ସେବାକୁ ଉଦ୍ଘାଟନ କରିଛନ୍ତି। ଅହମ୍ମଦାବାଦ ଓ ଅଯୋଧ୍ୟା ମଧ୍ୟରେ ସପ୍ତାହରେ ୩ଟି ବିମାନ ଚଳାଚଳ କରିବ। ଏହି ଅବସରରେ ସେ କହିଛନ୍ତି, ଏହି ବିମାନ ସେବା ଦୁଇ ସହର ମଧ୍ୟରେ ଯୋଗାଯୋଗ ବ୍ୟବସ୍ଥାରେ ଉନ୍ନତି ଆଣିବ। ଶ୍ରୀ ସିନ୍ଦିଆ କହିଛନ୍ତି, ଅହମ୍ମଦାବାଦ ଭାରତର ଅର୍ଥନୈତିକ ଶକ୍ତିର ପ୍ରତୀକ ହୋଇଥିବା ବେଳେ ଅଯୋଧ୍ୟା ଭାରତର ଆଧ୍ୟାତ୍ମିକ ଶକ୍ତିର ପ୍ରତୀକ ବହନ କରେ। ସେ କହିଛନ୍ତି, ସେହି ଦୁଇ ସହର ମଧ୍ୟରେ ବିମାନ ସଂଯୋଗ ଅର୍ଥନୈତିକ ଅଭିବୃଦ୍ଧି ଓ ପର୍ୟ୍ୟଟନର ବିକାଶରେ ସହାୟକ ହେବ।
ଉତ୍ତରପ୍ରଦେଶରେ ବେସାମରିକ ବିମାନ ଚଳାଚଳ କ୍ଷେତ୍ରର ଅଭିବୃଦ୍ଧି ବିଷୟରେ ଶ୍ରୀ ସିନ୍ଦିଆ କହିଛନ୍ତି, ଉତ୍ତରପ୍ରଦେଶରେ ବିମାନ ବନ୍ଦର ସଂଖ୍ୟା ୧୦ରେ ପହଞ୍ଚିଛି। ସେ କହିଛନ୍ତି, ଆସନ୍ତା ମାସରେ ଉତ୍ତରପ୍ରଦେଶକୁ ଆଉ ୫ଟି ବିମାନ ବନ୍ଦର ମିଳିବ। ସେଗୁଡ଼ିକ ଆଜମଗଡ଼, ଆଲିଗଡ଼, ମୋରାଦାବା ବାଦ, ଶ୍ରାବସ୍ତି ଓ ଚିତ୍ରକୂଟ ଠାରେ ନିର୍ମାଣ କରାଯାଉଛି।
