କେଶଦୁରାପାଳ: କାମ କରି ମଜୁରୀ ମାଗିବାରୁ ମଜୁରୀ ବଦଳରେ ଜଣେ ବ୍ୟକ୍ତିଙ୍କୁ ଦୃବୃର୍ତ୍ତ ମାନେ କଟୁରୀରେ ହାଣି ଗୁରୁତର କରିଛନ୍ତି । ଏଭଳି ଏକ ଅଭାବନୀୟ ଘଟଣା ଘଟିଛି ଆନନ୍ଦପୁର ଥାନା ଅଞ୍ଚଳର କଣ୍ଟିପାଳ ପଞ୍ଚାୟତ ପଇତା ପାଣି ଗ୍ରାମରେ । ଗ୍ରାମର କିଛି ଲୋକ ବିଭୀଷଣ ହୋଙ୍କୁ କଟୁରୀରେ ମରଣାନ୍ତକ ଆକ୍ରମଣ କରିଛନ୍ତି । ବିଭୀଷଣଙ୍କୁ ପ୍ରଥମେ ଆନନ୍ଦପୁର ଡାକ୍ତରଖାନା ଓ ପରେ କଟକ ସ୍ଥାନାନ୍ତର କରାଯାଇଥିବା ଜଣାପଡ଼ିଛି ।
ଅଭିଯୋଗ ଅନୁସାରେ ବିଭୀଷଣ ହୋ କିଛି ଦିନ ପୂର୍ବେ ବନ ବିଭାଗର ଠିକାଦାର ଜରିଆରେ କାମ କରିଥିଲେ । ହେଲେ ଆଜି ଯାଏ ମଜୁରୀ ମିଳିନଥିବାରୁ ଗ୍ରାମର ପ୍ରତାପ ନାଇକ ଓ ଚେମୁଟୁ ନାଇକଙ୍କୁ ପାଉଣା ମାଗିଥିଲେ । ଏହାକୁ ନେଇ ସେମାନଙ୍କ ମଧ୍ୟରେ ବଚସା ହୋଇଥିଲା । ଆଜି ବିଭୀଷଣ ନିଜ ଧାନ ଜଗି ଥିବା ବେଳେ ପ୍ରତାପ ନାଇକ ଓ ଚେମୁଟୁ ତାଙ୍କୁ ଏକ ଧାରୁଆ କଟୁରୀରେ ଆକ୍ରମଣ କରି ଥିଲେ । ଏଥିରେ ବିଭୀଷଣ ହୋ ଗୁରୁତର ଆହତ ହୋଇଥିଲେ । ବିଭୀଷଣଙ୍କ ସ୍ତ୍ରୀ ଓ ପରିବାର ଲୋକ ମିଶି ତାଙ୍କୁ ଆନନ୍ଦପୁର ଡାକ୍ତରଖାନାରେ ଭର୍ତି କରିଥିଲେ । ମାତ୍ର ଅବସ୍ଥା ଗୁରୁତର ହେବାକୁ ଡ଼ାକ୍ତରଖାନା କର୍ତ୍ତୃପକ୍ଷ ତାଙ୍କୁ କଟକ ପଠାଇ ଦେଇଥିବା ସୂଚନା ମିଳିଛି ।
Comments are closed.