ଆଠଗଡ଼: ଆଠଗଡ-ମୁଣ୍ଡଳି ରାସ୍ତାର ବେତଖୋଲି ଓ ମେଘା ମଧ୍ୟବର୍ତ୍ତୀ ଡାଳଖାଇ ମନ୍ଦିର ନିକଟରେ ରାତି ପ୍ରାୟ ୮ ଟାରେ ଗୋଟିଏ ବାଇକ୍ ସହିତ ବୋଲେରୋ ଧକ୍କା ହେବା ଫଳରେ ୩ ଜଣ ବାଳକ ଆରୋହୀଙ୍କ ମଧ୍ୟରୁ ଜଣେ ମୃତ୍ୟୁବରଣ କରିଥିବାବେଳେ ଅନ୍ୟ ଦୁଇଜଣ ଗୁରୁତର ଆହତ ହୋଇଛନ୍ତି ।
ବିବରଣୀରୁ ପ୍ରକାଶ ଆଠଗଡ ଥାନା ଅନ୍ତର୍ଗତ ବେଣ୍ଟପଦା ପଞ୍ଚାୟତ ଅଧିନ ବାଲିପଦା ଗ୍ରାମର ବାମଦେବ ପ୍ରଧାନଙ୍କ ପୁଅ ସାଗର (୨୫), ଗଗନ ପ୍ରଧାନଙ୍କ ପୁଅ ତପନ (୨୫) ଏବଂ ବଡମ୍ବା ଥାନା ଅନ୍ତର୍ଗତ ଖୁଣ୍ଟକଟା ପଞ୍ଚାୟତ ଅଧିନ କଜଳବେଡା ଗ୍ରାମର ଲକ୍ଷ୍ମୀଧର ମହାରଣାଙ୍କ ପୁଅ ରାଘବ (୨୪) ଏକ ବାଇକ୍ ରେ କଟକ ବାଲିଯାତ୍ରା ଦେଖିବାକୁ ରାତି ପ୍ରାୟ ୮ ଟା ବେଳେ ଯାଉଥିଲେ। ସେହି ସମୟରେ ମୁଣ୍ଡଳି ପଟରୁ ଆଠଗଡ ଆଡକୁ ଆସୁଥିବା ଏକ ବୋଲେରୋ ଗାଡି ସେମାନଙ୍କ ବାଇକକୁ ଡାଳଖାଇ ମନ୍ଦିର ନିକଟରେ ସମ୍ମୁଖରୁ ଧକ୍କା ଦେଇଥିଲା। ତିନିଜଣ ବାଇକ ଆରୋହୀଙ୍କ ମଧ୍ୟରୁ ବଡମ୍ବା କଜଳବେଡା ଗ୍ରାମର ରାଘବଙ୍କର ଘଟଣାସ୍ଥଳରେ ମୃତ୍ଯୁ ହୋଇ ଯାଇଥିବାବେଳେ ଗୁରୁତର ଆହତ ହୋଇଥିବା ବାଲିପଦାର ଦୁଇ ଯୁବକ ସାଗର ଓ ତପନଙ୍କୁ ତୁରନ୍ତ ଘଟଣାସ୍ଥଳରୁ ହିଁ କଟକ ସ୍ଥାନାନ୍ତରିତ କରାଯାଇଛି।
ଆଠଗଡ ପୁଲିସ ଘଟଣାସ୍ଥଳରୁ ମୃତ ଯୁବକର ଶବ ଉଦ୍ଧାର କରି ବ୍ୟବଛେଦ ପାଇଁ ଆଠଗଡ ଡାକ୍ତରଖାନା ଆଣିବା ସହ ଦୁର୍ଘଟଣାର ତଦନ୍ତ ଆରମ୍ଭ କରିଥିବା ଜଣାପଡିଛି।
Comments are closed.