ମୁମ୍ବଇ: ମହାରାଷ୍ଟ୍ରର ମୁମ୍ବଇ ସହରରେ କିଛି ମାସ ପୂର୍ବେ ଉଦ୍ଘାଟିତ ହୋଇଥିବା ଅଟଳ ସେତୁରେ ଫାଟ ସୃଷ୍ଟି ହୋଇଛି। ଏହି ସେତୁ ନିର୍ମାଣରେ ବ୍ୟାପକ ଦୁର୍ନୀତି ହୋଇଥିବାରୁ ଏହା ଫାଟିଛି ବୋଲି ମହାରାଷ୍ଟ୍ର ପ୍ରଦେଶ କଂଗ୍ରେସ ସଭାପତି ନାନା ପାଟୋଲେ ଅଭିଯୋଗ କରିଛନ୍ତି। ଏହି ପ୍ରସଙ୍ଗରେ ସେ ରାଜ୍ୟରେ କ୍ଷମତାସୀନ ମେଣ୍ଟ ସରକାର (ଶିବସେନା, ବିଜେପି ଓ ଏନସିପି) ଉପରେ ଦୋଷାରୋପ କରିଛନ୍ତି। ଶନିବାର ପାଟୋଲେ ଏହି ପୋଲର ଫାଟ ସୃଷ୍ଟି ହୋଇଥିବା ସ୍ଥାନ ପରିଦର୍ଶନ କରିଛନ୍ତି। ୧୮୦୦୦ କୋଟି ଟଙ୍କାରେ ନିର୍ମିତ ୨୧.୮ କିମି ଦୈର୍ଘ୍ୟ ବିଶିଷ୍ଟ ଏହି ପୋଲ ଦକ୍ଷିଣ ମୁମ୍ବଇର ସେୱରି ଓ ନଭି ମୁମ୍ବଇକୁ ସଂଯୋଗ କରୁଛି। ଚଳିତବର୍ଷ ଜାନୁଆରୀ ୧୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ପୋଲକୁ ଉଦ୍ଘାଟନ କରିଥିଲେ। ଅପରପକ୍ଷରେ ସେତୁରେ ଫାଟ ଅଭିଯୋଗକୁ ବିଜେପି ଖଣ୍ଡନ କରିଛି। ପ୍ରକୃତରେ ସେତୁ ନୁହେଁ, ସେତୁକୁ ସଂଯୋଗ କରୁଥିବା ସର୍ଭିସ ରୋଡରେ ଫାଟ ସୃଷ୍ଟି ହୋଇଛି ବୋଲି ସରକାର ସ୍ପଷ୍ଟ କରିଛନ୍ତି। ଏହି ଫାଟ ଯୋଗୁଁ ସେତୁରେ ଚଳାଚଳ କରୁଥିବା ଯାନବାହନ ପ୍ରତି କୌଣସି ବିପଦର ସମ୍ଭାବନା ନାହିଁ ବୋଲି ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ କହିଛନ୍ତି।
Comments are closed.