ଲକ୍ଷ୍ମୀପୁର: ଖାଦ୍ୟର ମାନ ପରଖିବା ପାଇଁ ଜିଲାରେ ରହିଛନ୍ତି ଖାଦ୍ୟ ଅଧିକାରୀ ଓ ନିରୀକ୍ଷକ। ସେମାନଙ୍କ କାମ ଖାଦ୍ୟର ମାନ ପରଖିବା। ତେବେ ଉକ୍ତ ଅଧିକାରୀମାନେ କେବଳ ବିଭିନ୍ନ ହୋଟେଲଠାରୁ ଆରମ୍ଭ କରି ଜଳଖିଆ ଦୋକାନ ଆଦି ଉପରେ ଚଢାଉ କରୁଥିବା ବେଳେ ସରକାରଙ୍କ ଦ୍ଵାରା ପରିଚାଳିତ ହେଉଥିବା ଆଦିବାସୀ ଊନ୍ନୟନ ବିଭାଗ ଦ୍ଵାରା ଆଶ୍ରମ ବିଦ୍ୟାଳୟଗୁଡିକର ଖାଦ୍ୟର ମାନ ପରଖିବା ଦେଖିବାକୁ ମିଳୁନାହିଁ। ଯେଉଁଠାରେ କି ଛୋଟ ଛୋଟ କୋମଳମତି ପିଲାମାନେ ସେମାନଙ୍କ ବାପା ମାଆଙ୍କୁ ଛାଡ଼ି ଆସି ରହୁଛନ୍ତି। ସରକାର ଏମାନଙ୍କ ନିମନ୍ତେ ସକାଳ ଜଳଖିଆଠାରୁ ଆରମ୍ଭ କରି ଦ୍ବିପ୍ରହର ଓ ରାତ୍ରି ଭୋଜନ ଯୋଗାଇବାର ବ୍ୟବସ୍ଥା କରିଛନ୍ତି। କିନ୍ତୁ ବିଡମ୍ବନାର ବିଷୟ ହେଉଛି ଯେଉଁ ଅନୁଷ୍ଠାନଗୁଡିକରେ ଶହ ଶହ ପିଲା ବା ଆମେ ଯାହାଙ୍କୁ ଆଗାମୀ ଭବିଷ୍ୟତ ବୋଲି କହୁଛୁ ସେଠାରେ ଖାଦ୍ୟର କୌଣସି ମାନ ଯାଞ୍ଚ କରାଯାଉନାହିଁ। ଯେଉଁଥିପାଇଁ ବିଭିନ୍ନ ରାଜ୍ୟର ଆଶ୍ରମ ବିଦ୍ୟାଳୟରେ ଅନେକ ସମୟରେ ଅନେକ ଅଘଟଣମାନ ଘଟୁଥିବା ଦେଖିବାକୁ ମିଳୁଛି। ଏଠାରେ ପ୍ରଶ୍ନ ଉଠୁଛି କ’ଣ କେବଳ ବେସରକାରୀ ହୋଟେଲ ଓ ଜଳଖିଆ ଦୋକାନରେଗୁଡ଼ିକରେ ନିମ୍ନ ମାନର ଖାଦ୍ୟ ଲୋକମାନଙ୍କୁ ଦିଆଯାଉଛି। ଅନେକ ଆଶ୍ରମ ବିଦ୍ୟାଳୟରେ ଯେଉଁ ଖାଦ୍ୟ ସବୁ ପିଲାମାନଙ୍କୁ ଦିଆଯାଉଛି ତାହା ଅତ୍ୟନ୍ତ ନିମ୍ନ ମାନର। ଏପରିକି ଯେଉଁ ଦୋକାନଗୁଡିକରୁ ଖାଦ୍ୟ ସାମଗ୍ରୀ କ୍ରୟ କରାଯାଉଛି ସେମାନେ ବଜାର ଦରଠାରୁ କେତେ କମ ଦରରେ ଦେଇ ପାରିବେ ସେନେଇ ମୂଲଚାଲ କରାଯାଉଛି।
ଅନ୍ୟ ପକ୍ଷରେ ଖାଦ୍ୟ ପ୍ରସ୍ତୁତି ଓ ସେଗୁଡ଼ିକ ଠିକ୍ ଭାବେ ଘୋଡାଯାଉଛି କି ନାହିଁ ଏବଂ ଯେତିକି ପରିମାଣର ମିଳିବା କଥା ତାହା ମଧ୍ୟ ଯାଞ୍ଚ କରାଯାଉ ନାହିଁ। ଯେଉଁଥିପାଇଁ କ୍ୟାଲୋରୀ ଅଭାବରୁ ଅନେକ ସମୟରେ ପିଲାମାନେ ବିଭିନ୍ନ ରୋଗରେ ପୀଡିତ ହେଉଥିବା ଦେଖିବାକୁ ମିଳୁଛି। ଏହାର ପ୍ରତିକାର ପାଇଁ ଜିଲା ପ୍ରଶାସନ ହୁଅନ୍ତୁ ଅବା ଫୁଡ୍ ଅଫିସର ଓ ଖାଦ୍ୟ ନିରୀକ୍ଷକମାନେ ଯତ୍ନବାନ ହୋଇ ଦେଶର ଆଗାମୀ ଭବିଷ୍ୟତ କୁହାଯାଉଥିବା ଆଶ୍ରମ ବିଦ୍ୟାଳୟରେ ରହି ଅନ୍ତେବାସୀମାନଙ୍କୁ ଯେଉଁ ଖାଦ୍ୟ ସବୁ ଦିଆଯାଉଛି କିଛିଦିନ ଅନ୍ତରରେ ଯାଞ୍ଚ କରିବା ଆବଶ୍ୟକ।
