କାଲିମେଳା: ମାଲକାନଗିରି ଜିଲ୍ଲା କାଲିମେଳା ଅଞ୍ଚଳରେ ଆଦର୍ଶ ବିଦ୍ୟାଳୟରେ ପାଠ ପଢୁଥିବା ଜଣେ ନାବାଳିକାକୁ ୨ ଜଣ ଯୁବକ ପ୍ରଥମେ ଅପହରଣ କରି ପରେ ବଳାତ୍କାର କରିଥିବା ନେଇ କାଲିମେଳା ଥାନାରେ ଅଭିଯୋଗ ହୋଇଛି। ଏହି ଅଭିଯୋଗରେ କାଲିମେଳା ପୁଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରି ସୋମବାର କୋର୍ଟ ଚାଳାଣ କରିଥିବା ଜଣାପଡିଛି।
କାଲିମେଳା ଥାନା ଅଧିକାରୀ ରାମ ପ୍ରସାଦ ନାଗଙ୍କ ସୂଚନା ଅନୂଯାୟୀ ସିଆଡିମାଳ ଅଞ୍ଚଳର ଜଣେ ୧୪ ବର୍ଷର ନାବାଳିକା ଝିଅ ପଡିଆ ବ୍ଲକର ଗିରକାନପାଲ୍ଲୀ ଆଶ୍ରମ ବିଦ୍ୟାଳୟରେ ପଡୁଥିବା ସମୟରେ ଉକ୍ତ ଗିରକାନପାଲ୍ଲୀ ଗ୍ରାମର ଜଣେ ୧୯ ବର୍ଷ ଯୁବକ ସହିତ ଛାତ୍ରୀ ପରିଚୟ ହେବା ସହ ବହୁଦିନ ଧରି ଉଭୟଙ୍କ ମଧ୍ୟରେ ଲୁଚିଛପି କଥାବାର୍ତ୍ତା ମଧ୍ୟ ଚାଲିଥିଲା। ପରେ ଛାତ୍ରୀ ଜଣଙ୍କ ଗତ ଜୁନ ମାସ ଖରା ଛୁଟିରେ ନିଜ ଘର ସିଆଡିମାଳକୁ ଚାଲିଯାଇ ଥିଲେ ଓ ପରେ କାଙ୍ଗୁରୁକୋଣ୍ଡା ଆଦର୍ଶ ବିଦ୍ୟାଳୟରେ ଛାତ୍ରୀ ଜଣଙ୍କ ନାମ ଲେକାଇଥିଲେ।
ଗତ ଜୁନ ମାସ ଶେଷ ସପ୍ତାହରେ ଗିରକାନପାଲ୍ଲୀ ଗ୍ରାମର ଉକ୍ତ ଯୁବକ ସେହି ଗ୍ରାମର ଅନ୍ୟ ଜଣେ ସାଥୀ ସହିତ ଏକ ମଟର ସାଇକେଲ ଯୋଗେ ଗିରକାନପାଲ୍ଲୀରୁ ଛାତ୍ରୀକୁ ଦେଖା କରିବାକୁ ସିଆଡିମାଳ ଯାଇଥିଲେ। ପରେ ଛାତ୍ରୀଙ୍କୁ ଗ୍ରାମରେ ଥିବା ଏକ ମନ୍ଦିର ନିକଟସ୍ଥ ଜଙ୍ଗଲ ଭିତରକୁ ଡାକି ତା ସହିତ ଆଗରୁ ପରିଚୟ ହୋଇଥିବା ଯୁବକ ନାବାଳିକାକୁ ବଳାତ୍କାର କରିଥିବା ଅଭିଯୋଗ ହୋଇଛି। ଏଥିରେ ଅନ୍ୟ ଜଣେ ନାବାଳକ ଭିଡିଓ କରିବାସହ ତାକୁ ସହାୟତା କରିଥିବା ଅଭିଯୋଗ ହୋଇଛି। ପରେ ଏହି ଦୁଇଜଣ ଯୁବକ ଏ କଥା କାହାକୁ ନଜଣାଇବା ପାଇଁ ଧମକ ଦେବାସହ ୭ ହଜାର ଟଙ୍କା ଯାଚିଥିଲେ। ଏହି କଥା ପ୍ରଘଟ କଲେ ବଳାତ୍କାର ବିଡିଓକୁ ଭାଇରାଲ କରିଦେବୁ ବୋଲି ଧମକ ଦେଇଥିବା ଥାନାରେ ଗୁରୁତର ଅଭିଯୋଗ ହୋଇଛି। ଏହି ଘଟଣା ବିଷୟରେ ଛାତ୍ରୀ ଜଣଙ୍କ ଘରେ କହିବା ପରେ ପରିବାର ଲୋକ ଗତ ୨୭ ତାରିଖରେ କାଲିମେଳା ଥାନାରେ ମାମଲା ରୁଜୁ କରିଥିଲେ। କାଲିମେଳା ପୁଲିସ ଏହାର ତଦନ୍ତ କରି ଆଜି ଗିରକାନପାଲ୍ଲୀ ଗ୍ରାମର ଦୁଇଜଣ ଯୁବକଙ୍କୁ ଗିରଫ କରିବା ସହ ଥାନା କେସ ନଂ ୪୧/୧୮ ରେ କେ ମାମଲା ରୁଜୁ କରି ସେମାନଙ୍କ ବିରୋଧରେ ପୋକ୍ସୋ ଧାରା ଲଗାଯାଇଥିବା ଜଣାପଡିଛି।
