ଲଗାଣବର୍ଷା ଓ ସମୁଦ୍ର ଜୁଆର ମାଡରେ ନଦୀକୁ ଧସିଲା ବାସଗୃହ; ଅଳ୍ପକେ ବର୍ତ୍ତିଲା ପରିବାର

ଆରଡି: ଗତ ୨ଦିନ ହେବ ଲଘୁଚାପଜନିତ ଲଗାଣ ବର୍ଷା ଓ ସମୁଦ୍ରର ଜୁଆର ମାଡରେ ଭଦ୍ରକ ଜିଲା ଆରଡି ନିକଟସ୍ଥ ଶୀତଳପୁର ଗାଁରେ ସାଳନ୍ଦୀ ନଦୀ କୂଳ ଲଂଘିବା ଫଳରେ ନଦୀପଠାକୁ ଲାଗି ଥିବା ବାବାଜି ପରିଡା, ପଦ୍ମଲୋଚନ ପରିଡାଙ୍କ ସହ ୫ଟି ପରିବାରର ଭିଟାମାଟି ଏବେ ନଦୀରେ ଲୀନ ହେବାକୁ ବସିଛି। ଏପରିକି ସୋମବାର ଲଗାଣ ବର୍ଷା ଓ ସମୁଦ୍ରର ଜୁଆର ମାଡରେ ବାବାଜି ପରିଡାଙ୍କ ୨ବଖରା ବାସଗୃହ ସମ୍ପୂର୍ଣ୍ଣ ଭାବେ ନଦୀକୁ ଧସି ଯିବାରୁ ଘରେ ଥିବା ସମସ୍ତ ଆସବାବପତ୍ର ମାଟି ତଳେ ଚାପି ହୋଇ ରହିଛି। ଫଳରେ ଗତକାଲି ରାତିରୁ ପରିବାର ଲୋକ ନିଜର ଭିଟାମାଟି ଛାଡି ଅନ୍ୟ ଘରେ ଆଶ୍ରୟ ନେଇଛନ୍ତି। କିଛିମାସ ପୂର୍ବରୁ ନଦୀର ଜୁଆର ପାଣି ମାଡରେ ୪ଟି ପରିବାରଙ୍କର ବାସଗୃହ ଅଣ୍ଟାଏ ଉଚ୍ଚରୁ ଦବିଯାଇଥିଲା। ଏପରି ଘଟଣାର ଖବର ପାଇ ଜିଲା ପ୍ରଶାସନ ପରିବାର ଲୋକଙ୍କୁ ଭେଟିବା ସହ ଉକ୍ତ ସ୍ଥାନ ବିପଦପୂର୍ଣ୍ଣ ଥିବାରୁ ଅନ୍ୟତ୍ର ଆଶ୍ରୟ ନେବା ପାଇଁ ପରାମର୍ଶ ଦେଇଥିଲେ। ଅନ୍ୟପଟେ ନଦୀରେ ହିଂସ୍ର କୁମ୍ଭୀର ଭୟ ରହିଥିବାରୁ ଭୟରେ ଜୀବନ ବିତାଉଛନ୍ତି ନଦୀକୂଳିଆ। ଏଥିସହ ପ୍ରତିଦିନ ନଦୀପଠା ଦେଇ ଯାତାୟତ କରୁଥିବା ସ୍କୁଲ ପିଲା ଓ ଗାଁ ଲୋକଙ୍କ ସୁରକ୍ଷା ପାଇଁ ନଦୀ କଡରେ ଜାଲ ଘେରାଇଛନ୍ତି ଗାଁ ଲୋକ।