ଆରଡି : ବାତ୍ୟା ବୁଲବୁଲରେ ଅଧିକ ପ୍ରଭାବିତ ହୋଇଥିବା ଭଦ୍ରକ ଜିଲା ଚାନ୍ଦବାଲି ବ୍ଲକର ତଳିଆ ଅଞ୍ଚଳ ଆରଡି, ଓଳଗ, ନାନ୍ଦପୁର ଓ ସୁନ୍ଦପୁର ପଞ୍ଚାୟତରେ ଶହଶହ ହେକ୍ଟର ଚାଷଜମିରେ ପାଣି ଜମି ରହିଥିବାରୁ ପାଚିଲା ଧାନର କେଉଁଠି କଳା ପଡିଗଲାଣିତ ଆଉ କେଉଁଠି ଗଜା ହେବାକୁ ବସିଲାଣି। ଏପରି ସ୍ଥିତିରେ ଚାଷିମାନେ ଧାର କରଜ କିପରି ସୁଜିବେ ସେଥିପାଇଁ ମୁଣ୍ଡରେ ହାତ ଦେଇ ବସିଛନ୍ତି। ବୁଲବୁଲର ପ୍ରକୋପ ଛାଡିବା ପରେ ସୋମବାର ଉଜୁଡି ଯାଇଥିବା ଅମଳ ଧାନର କ୍ଷୟକ୍ଷତିର ଆକଳ ନିମନ୍ତେ ଜିଲା ପ୍ରଶାସନ ଓ କୃଷି ବିଭାଗ ପକ୍ଷରୁ ମିଳିତ ଭାବେ କ୍ଷେତ ପରିଦର୍ଶନ କରିଛନ୍ତି। ଏହି ପରିଦର୍ଶନରେ ଆରଡି ରାଜସ୍ୱ ନୀରିକ୍ଷକ ଦେବାଷିଶ ରାୟ, କୃଷି ବିଭାଗର ଭିଏଲଡବ୍ଲୁ ରଞ୍ଜିତା ପଣ୍ଡାଙ୍କ ନେତୃତ୍ୱରେ ୪ଜଣ ଟିମ ବିଭିନ୍ନ ଅଞ୍ଚଳକୁ ଯାଇ ଚାଷୀମାନଙ୍କୁ ଭେଟିବା ସହ ବର୍ଷାପାଣିରେ ବୁଡି ରହିଥିବା ଅମଳଧାନର ମାନ ଦେଖିଥିଲେ। ତାହାସହ ଖାଲୁଆ ଜମିରେ ବର୍ଷାପାଣିରେ ଅମଳ ହେବାକୁ ଥିବା ଧାନ ବୁଡି ରହିଛି। ସେହିପରି ପବନରେ ସମସ୍ତ ଧାନକ୍ଷେତରେ ଧାନଥୋଡ ସହ ପାଚିଲା ଧାନ ଲୋଟୁଥିବା ଦେଖିବାକୁ ପାଇଥିଲେ। ପରିଦର୍ଶନରେ ଯାଇଥିବା ଅଧିକାରୀମାନଙ୍କ କହିବା ଅନୁଯାୟୀ ଉକ୍ତ ଅଞ୍ଚଳରେ ବୁଲବୁଲ ପ୍ରଭାବରେ ସମସ୍ତ ଧାନକ୍ଷେତରେ କ୍ଷତି ଘଟିଥିବା ପ୍ରକାଶ କରିଥିଲେ।
Comments are closed.