୩୫ବର୍ଷ ପରେ ନିଜ ଘର ଦେଖିଲେ ସ୍ମୃତି ଇରାନୀ

ଗୁରୁଗ୍ରାମ : ଦୀର୍ଘ ୩୫ବର୍ଷ ପରେ କେନ୍ଦ୍ରମନ୍ତ୍ରୀ ତଥା ପୂର୍ବତନ ଅଭିନେତ୍ରୀ ସ୍ମୃତି ଇରାନୀ ଏଠାରେ ଥିବା ନିଜ ପ୍ରଥମ ଘର ପରିଦର୍ଶନ କରିଛନ୍ତି। ଏଥିରେ ଅତ୍ୟନ୍ତ ଭାବବିହ୍ୱଳ ହୋଇପଡ଼ିଥିବା ସ୍ମୃତି ରିକ୍ସାରେ ବସି ପ୍ରିୟ ଚାଟ୍‍ ଦୋକାନ ମଧ୍ୟ ଯାଇଥିଲେ ଓ ଗାଁର କିଛି ଲୋକଙ୍କୁ ଚିହ୍ନି ଖୁସି ବ୍ୟକ୍ତ କରିଥିଲେ। ପ୍ରଯୋଜିକା ଏକତା କପୁର ତାଙ୍କ ସହିତ ଗୁରୁଗ୍ରାମ ଯାଇଥିଲେ। ତେବେ ନିଜର ପୁରୁଣା ଘର ଏବେ ଦୋକାନରେ ପରିଣତ ହୋଇଥିବା ଦେଖି ଦୁଃଖ ପ୍ରକାଶ କରିଥିଲେ। ଏକତାଙ୍କ ଆଗାମୀ ଧାରାବାହିକ ‘ହୋମ୍‍’ର ନିର୍ମାଣ ପରିପ୍ରେକ୍ଷୀରେ ସ୍ମୃତି ଗାଁକୁ ଯାଇଥିବା ପ୍ରକାଶ। ‘କ୍ୟୁଁ କି ଶାସ୍‍ ଭି କଭି ବହୂ ଥି’ ଧାରାବାହିକରେ ଏକତ୍ର କାମ କରିଥିବା ଏକତା ଓ ସ୍ମୃତିଙ୍କ ମଧ୍ୟରେ ନିବିଡ଼ ସମ୍ପର୍କ ରହିଛି।