ଭୁବନେଶ୍ଵର: ସାମୁଦ୍ରିକ ଘୂର୍ଣିଝଡ଼ ‘ଅମ୍ପନ’ର ତୀବ୍ରତା କମୁଛି । ମହାବାତ୍ୟା କ୍ରମଶଃ ଦୁର୍ବଳ ହେଉଛି । ପୂର୍ବରୁ ଏହା ମହାବାତ୍ୟା ବା ସୁପର ସାଇକ୍ଲୋନ୍ ରୂପ ଧାରଣ କରିବ ବୋଲି ଯେଉଁ ଆକଳନ ହୋଇଥିଲା ତାହା ଏବେ ଅତିଭୀଷଣ ଘୂର୍ଣିଝଡ଼ର ରୂପ ନେଇପାରେ ବୋଲି ପାଣିପାଗ ବିଜ୍ଞାନୀ ଆକଳନ କରିଛନ୍ତି ।
ପୂର୍ବରୁ ଅମ୍ପନର ଗତି ୨୫୦ କିଲୋମିଟର ଅତିକ୍ରମ କରିବ ବୋଲି ଆକଳନ କରାଯାଇଥିଲା । ମାତ୍ର ସମୁଦ୍ରରେ ଦୀର୍ଘ ସମୟ ଧରି ଗତି କରିବା ପରେ ଏହାର ତୀବ୍ରତା ସାମାନ୍ୟ ହ୍ରାସ ପାଇଛି ବୋଲି କୁହାଯାଉଛି । ଆସନ୍ତାକାଲି ଦୁଇଟାରୁ ରାତି ୭ଟା ମଧ୍ୟରେ ଏହା ସୁନ୍ଦରବନରେ ଭୂ-ଭାଗ ସ୍ପର୍ଶ କରିବାର ସମ୍ଭାବନା ରହିଛି । ସ୍ଥଳଭାଗ ଛୁଇଁଲା ବେଳକୁ ପବନର ବେଗ ୧୫୫ ରୁ ୧୬୫ କିଲୋମିଟର ରହିବାର ସମ୍ଭାବନା ଅଛି । ସେହିପରି ସର୍ବାଧିକ ତୀବ୍ର ଧକ୍କାର ବେଗ ବା ଗଷ୍ଟିଂ ଓ୍ୱିଣ୍ଡ ସ୍ପିଡ୍ ଘଣ୍ଟାପ୍ରତି ୧୮୦ କିଲୋମିଟର ପର୍ଯ୍ୟନ୍ତ ଯାଇପାରେ ବୋଲି ଆକଳନ କରାଯାଉଛି ।
ଆଜି ଅପରାହ୍ନ ଗୋଟାଏ ବେଳକୁ ଅମ୍ପନ ପାରାଦୀପର ଦକ୍ଷିଣରେ ୫୨୦ କିଲୋମିଟର ଓ ଦୀଘାଠାରୁ ୬୭୦ କିଲୋମିଟର ଦୂର ବଙ୍ଗପସାଗରରେ ରହିଛି । ସମୁଦ୍ରରେ ଗତ ୬ଘଣ୍ଟା ହେଲା ଘଣ୍ଟାକୁ ୧୪ କିଲୋମିଟର ବେଗରେ ଉତ୍ତର ଓ ଉତ୍ତରପୂର୍ବ ଦିଗକୁ ଗତି କରୁଛି । ସମୁଦ୍ରରେ ଅମ୍ପନର ଆଖି (ନାଭିକେନ୍ଦ୍ର) ପ୍ରାୟ ୨୦ କିଲୋମିଟର ବ୍ୟାସର ବୋଲି ଆକଳନ କରାଯାଇଛି । ଏହିସ୍ଥିତିରେ ଯେଉଁ ସ୍ଥାନରେ ଏହି ଘୂର୍ଣିଝଡ଼ ଭୂଭାଗ ସ୍ପର୍ଶ କରିବ ସେଠାରେ ଅନ୍ୟୂନ ୬୦ କିଲୋମିଟର ପରିଧିରେ ଏହା ପ୍ରଳୟ ସୃଷ୍ଟି କରିବ ବୋଲି ପାଣିପାଗ ବିଜ୍ଞାନୀମାନେ ମତ ଦେଇଛନ୍ତି ।
