ନୂଆଦିଲ୍ଲୀ: ଆସନ୍ତା ମେ ୩୧ ତାରିଖ ପର୍ଯ୍ୟନ୍ତ ବିମାନ କମ୍ପାନୀଗୁଡ଼ିକ ଯାତ୍ରୀ ଭଡ଼ା ବୃଦ୍ଧି କରିପାରିବେ ନାହିଁ। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏ ନେଇ ନିର୍ଦେଶ ଜାରି କରିଛି। କରୋନା ମହାମାରୀକୁ ଦୃଷ୍ଟିରେ ରଖି ଯାତ୍ରୀମାନଙ୍କୁ ଅଧିକ ଭଡ଼ାରୁ ରକ୍ଷା କରିବା ଲାଗି ଘରୋଇ ବିମାନ ସେବା ଉପରେ କ୍ୟାପ୍ ଲାଗୁ କରିଛି।
ଏହା ବ୍ୟତୀତ ମନ୍ତ୍ରଣାଳୟ ଗତକାଲି ଜାରି କରିଥିବା ଏକ ବିବୃତିରେ ମଧ୍ୟ କହିଛି ଯେ ୮୦ ପ୍ରତିଶତ କ୍ଷମତା ବିଶିଷ୍ଟ ଏୟାରଲାଇନ୍ସର କ୍ୟାପ୍ ଆସନ୍ତା ମାସ ଶେଷ ପର୍ଯ୍ୟନ୍ତ ରଖାଯିବ। କୋଭିଡ-୧୯ ଯୋଗୁ ବୁକିଂ ହ୍ରାସ ପାଇଥିବାରୁ ବିମାନ କମ୍ପାନୀଗୁଡିକ କ୍ଷମତାକୁ ୬୦ ପ୍ରତିଶତ ହ୍ରାସ କରିବାକୁ ସରକାରଙ୍କୁ ନିବେଦନ କରିବା ପରେ ଏହି ନିର୍ଦ୍ଦେଶ ଦିଆଯାଇଛି।
ବିମାନ ଚଳାଚଳ କର୍ତ୍ତୃପକ୍ଷଙ୍କ ସଦ୍ୟତମ ବିବୃତିରେ କୁହାଯାଇଛି ଯେ, ଦେଶରେ କରୋନା ସ୍ଥିତିକୁ ଦୃଷ୍ଟିରେ ରଖି ଏହି ନୂତନ ପଦକ୍ଷେପ ନିଆଯାଇଛି। ଏହାପୂର୍ବରୁ ବିମାନ ଚଳାଚଳ ନିୟନ୍ତ୍ରକ ଗ୍ରୀଷ୍ମ କାର୍ଯ୍ୟସୂଚୀ ପାଇଁ ୧୦୮ ବିମାନବନ୍ଦରରୁ ସପ୍ତାହକୁ ୧୮ ହଜାର ୮୪୩ ବିମାନ ଉଡ଼ାଣ ଅନୁମୋଦନ କରିଥିଲେ, ଯାହା ମାର୍ଚ୍ଚର ଶେଷ ରବିବାରରୁ ଆରମ୍ଭ ହୋଇ ଅକ୍ଟୋବରର ଶେଷ ରବିବାରରେ ଶେଷ ହେବ।
