ଭୁବନେଶ୍ୱର : ଉପାନ୍ତ ଅଞ୍ଚଳର ଗୁରୁତର ରୋଗୀଙ୍କୁ କିଭଳି ତ୍ବରିତ ଉତ୍ତମ ଚିକିତ୍ସା ସେବା ମିଳିପାରିବ ସେଦିଗରେ ରାଜ୍ୟ ସରକାର ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତିକୁ କାର୍ଯ୍ୟକାରୀ କରିବାକୁ ଯାଉଛନ୍ତି । ଏହି ଯୋଜନାର ନାମ ‘ମୁଖ୍ୟମନ୍ତ୍ରୀ ବାୟୁ ସେବା’ ରହିଛି । ପ୍ରଥମ ପର୍ଯ୍ୟାୟରେ ଉପାନ୍ତ ଅଞ୍ଚଳର ୪ ଜିଲାକୁ ଏଥିରେ ସାମିଲ କରାଯିବ । ସେଥିମଧ୍ୟରେ କଳାହାଣ୍ଡି, ମାଲକାନଗିରି, ନବରଙ୍ଗପୁର ଓ ନୂଆପଡ଼ା ଜିଲା ରହିଛି। ଏହାଦ୍ବାରା ଗୁରୁତର ରୋଗୀଙ୍କୁ ଉପାନ୍ତ ଅଞ୍ଚଳର ଜିଲାମୁଖ୍ୟ ଚିକିତ୍ସାଳୟରୁ ଏୟାରଲିଫ୍ଟ(ସ୍ବତନ୍ତ୍ର ବିମାନରେ ସ୍ଥାନାନ୍ତର) କରି ପ୍ରମୁଖ ଡାକ୍ତରଖାନାକୁ ଅଣାଯାଇପାରିବ। ଆଜି ଠାରୁ ଏଭଳି ଜରୁରୀ ସ୍ବାସ୍ଥ୍ୟସେବା ଲାଗି ବିମାନସେବାକୁ ସଂଯୋଗ କରାଯିବ।
ଏହି କାର୍ଯ୍ୟକ୍ରମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ବର ବିମାନ ବନ୍ଦରରେ ସୋମବାର ଉଦଘାଟନ କରିବେ ବୋଲି ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ ସୂଚନା ଦେଇଛନ୍ତି। ମନ୍ତ୍ରୀ ଶ୍ରୀ ଦାସ କହିଛନ୍ତି ଗୁରୁତର ରୋଗୀଙ୍କୁ ଠିକଣା ସମୟରେ ଚିକିତ୍ସା ଯୋଗାଇଦେବା ପାଇଁ ସରକାର ଏହି ଅଭିନବ ଉଦ୍ୟମ ହାତକୁ ନେଇଛନ୍ତି। ଆଜି ଭୁବନେଶ୍ୱର ବିମାନବନ୍ଦରରେ ପୂର୍ବାହ୍ନ ପ୍ରାୟ ୧୧ଟା ସମୟରେ ଏହି ସେବାକୁ ମୁଖ୍ୟମନ୍ତ୍ରୀ ଉଦଘାଟନ କରିବେ।
