ଭୁବନେଶ୍ବର: ଶିକ୍ଷା ଅଧିକାର ଆଇନ(ଆରଟିଇ) ୨୦୦୯ର ଧାରା ୧୨(୧)-ଗ ଅନୁଯାୟୀ ଚଳିତବର୍ଷ ସାମାଜିକ ଓ ଆର୍ଥିକ ଦୁର୍ବଳ ଶ୍ରେଣୀର ଛାତ୍ରଛାତ୍ରୀଙ୍କୁ ଘରୋଇ ବିଦ୍ୟାଳୟରେ ନାମଲେଖା ପାଇଁ ସୁଯୋଗ ମିଳିବ। ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ନାମଲେଖା ପ୍ରକ୍ରିୟା ସାରିବାକୁ ତତ୍ପରତା ପ୍ରକାଶ ପାଇଛି। ପାରଦର୍ଶୀ ପୋର୍ଟାଲ ଜରିଆରେ ନାମଲେଖା ପାଇଁ ଆବେଦନ କରାଯାଇଥିଲା। ଫେବୃୟାରୀରୁ ଚଳିତ ମାସ ପର୍ଯ୍ୟନ୍ତ ୫୯୭୦ ଛାତ୍ରଛାତ୍ରୀ ଆବେଦନ କରିଥିଲେ। ବ୍ଲକ୍ ଶିକ୍ଷା ଅଧିକାରୀ (ବିଇଓ) ପ୍ରମାଣପତ୍ର ଯାଞ୍ଚ କରିବା ପରେ ୩୮୩୯ ଆବେଦନକୁ ଯୋଗ୍ୟ ବିବେଚିତ କରାଯାଇଛି।
ଯୋଗ୍ୟ ବିବେଚିତ ହେଲେ ୩୬୦୯ ବିଦ୍ୟାର୍ଥୀ
ଅଗଷ୍ଟ ପହିଲାରୁ ଦ୍ବିତୀୟ ପର୍ଯ୍ୟାୟ ଆବେଦନ
ପାରଦର୍ଶୀ ପୋର୍ଟାଲରେ କେନ୍ଦ୍ରୀୟ ଲଟେରି କରାଯିବା ପରେ ୩୬୦୯ ଛାତ୍ରଛାତ୍ରୀଙ୍କ ନାମକୁ ମନୋନୟନ କରାଯାଇଛି। ଏହି ତାଲିକା ସଂପୃକ୍ତ ବିଇଓଙ୍କ ନିକଟକୁ ପଠାଯାଇଛି। ବିଇଓ ସମ୍ପୃକ୍ତ ବେସରକାରୀ ସ୍କୁଲକୁ ଛାତ୍ରଛାତ୍ରୀଙ୍କ ନାମ ତାଲିକା ପଠାଇବେ। ଘରୋଇ ବିଦ୍ୟାଳୟରେ ଜୁଲାଇ ୨୩ରୁ ନାମଲେଖା ଆରମ୍ଭ ହୋଇ ୩୧ରେ ଶେଷ ହେବ। ନାମଲେଖା ସରିବା ପରେ ଘରୋଇ ବିଦ୍ୟାଳୟରେ ଖାଲିଥିବା ସିଟ୍ ପାଇଁ ଅଗଷ୍ଟ ୧ରୁ ୧୦ ମଧ୍ୟରେ ପୁଣି ଥରେ ଆବେଦନ ପ୍ରକ୍ରିୟା ଆରମ୍ଭ ହେବ। ଛାତ୍ରଛାତ୍ରୀ ଓ ଅଭିଭାବକ www.rteparadarshi.odisha.gov.in ରେ ଆବେଦନ କରିପାରିବେ। ପୋର୍ଟାଲରେ ଆସନ୍ତାକାଲିଠୁ ଯୋଗ୍ୟ ବିବେଚିତ ବିଦ୍ୟାର୍ଥୀଙ୍କ ତାଲିକା ମିଳିବ ବୋଲି ବିଭାଗ ପକ୍ଷରୁ କୁହାଯାଇଛି।
