ଭୁବନେଶ୍ୱର : ଶିକ୍ଷା କ୍ଷେତ୍ରରେ ଜୀବନ ବ୍ୟାପୀ ସାଧନା ପାଇଁ ଶିକ୍ଷାବିତ୍ ଓ ସମାଜସେବୀ ଅଚ୍ୟୁତ ସାମନ୍ତଙ୍କୁ ଗଭର୍ଣ୍ଣିଂ କାଉନ୍ସିଲ୍ ଅଫ୍ ନ୍ୟାସ୍ନାଲ୍ ଟିଚର୍ସ କଂଗ୍ରେସ ପକ୍ଷରୁ ‘ଜୀବନ ଗୌରବ ପୁରସ୍କାର’ ପ୍ରଦାନ କରାଯାଇଛି। ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ସକାଶେ ପୁନେସ୍ଥିତ ଏମ୍ଆଇଟି ୱାଲ୍ର୍ଡ ପିସ୍ ବିଶ୍ୱବିଦ୍ୟାଳୟଠାରେ ୧୫ରୁ ୧୮ ତାରିଖ ପର୍ଯ୍ୟନ୍ତ ଚାଲୁଥିବା ୪ର୍ଥ ନ୍ୟାସ୍ନାଲ୍ ଟିଚର୍ସ କଂଗ୍ରେସର ଉଦ୍ଯାପନୀ ଉତ୍ସବ ଅବସରରେ ଶୁକ୍ରବାର ଶ୍ରୀ ସାମନ୍ତଙ୍କୁ ଏହି ପୁରସ୍କାର ଭର୍ଚୁଆଲ୍ ମୋଡ୍ରେ ପ୍ରଦାନ କରାଯାଇଛି। ଏହି କାର୍ଯ୍ୟକ୍ରମରେ ରାଜସ୍ଥାନ ରାଜ୍ୟପାଳ କଲରାଜ ମିଶ୍ର, କେନ୍ଦ୍ର କୌଶଳ ବିକାଶ ଓ ଔଦ୍ୟୋଗୀକରଣ ମନ୍ତ୍ରୀ ଡ. ମହେନ୍ଦ୍ର ନାଥ ପାଣ୍ଡେ, ଗ୍ଲୋବାଲ୍ ରିସର୍ଚ୍ଚ ଆଲିଆନ୍ସର ନ୍ୟାସ୍ନାଲ୍ ରିସର୍ଚ୍ଚ ପ୍ରଫେସର ଅଧ୍ୟକ୍ଷ ଡ. ଆର. ଏ. ମାସେଲ୍କର, ରିସର୍ଚ୍ଚ ଇନୋଭେସନ୍ ସର୍କଲ୍ ହାଇଦ୍ରାବାଦ୍ର ମହାନିର୍ଦେଶକ ଡ. ଅଜିତ ରାଙ୍ଗନେକର ଓ ଏମ୍ଆଇଟି ୱାଲ୍ର୍ଡ ପିସ୍ ବିଶ୍ୱବିଦ୍ୟାଳୟର ପ୍ରତିଷ୍ଠାତା ଡ. ବିଶ୍ୱନାଥ କରାଦ ପ୍ରମୁଖ ଉପସ୍ଥିତ ଥିଲେ। ୨୦୧୬ରେ ପ୍ରତିଷ୍ଠିତ ଗଭର୍ଣ୍ଣିଂ କାଉନ୍ସିଲ୍ ଅଫ୍ ନ୍ୟାସ୍ନାଲ୍ ଟିଚର୍ସ କଂଗ୍ରେସ ବର୍ତ୍ତମାନ ସୁଦ୍ଧା ଦେଶ ବିଦେଶର ବହୁ ନୀତି ନିର୍ଦ୍ଧାରକ, ବୁଦ୍ଧିଜୀବୀ, ଶିକ୍ଷାବିତ୍, ବୈଜ୍ଞାନିକ, ଆଧ୍ୟାତ୍ମିକ ଗୁରୁ ଆଦିଙ୍କୁ ଏହି କଂଗ୍ରେସରେ ସାମିଲ କରିବା ସହ ସମ୍ମାନିତ କରିସାରିଛି। ଦୀର୍ଘ ୩୦ ବର୍ଷ ଧରି ଶିକ୍ଷାର ବିକାଶ ଦିଗରେ ତାଙ୍କ କାର୍ଯ୍ୟର ସ୍ୱୀକୃତି ସ୍ୱରୂପ ଏହି ପୁରସ୍କାର ପ୍ରଦାନ କରାଯାଇଥିବାରୁ ଶ୍ରୀ ସାମନ୍ତ ଏଥି ପାଇଁ ଗଭର୍ଣ୍ଣିଂ କାଉନ୍ସିଲ୍ ଅଫ୍ ନ୍ୟାସ୍ନାଲ୍ ଟିଚର୍ସ କଂଗ୍ରେସକୁ ନିଜର କୃତଜ୍ଞତା ଜଣାଇଛନ୍ତି।
Comments are closed.