ଟଭେରା ଧକ୍କାରେ ଲୁନା ଚାଳକ ଗୁରୁତର

ପିପିଲି : ଭୁବନେଶ୍ୱର-ପୁରୀ ଜାତୀୟ ରାଜପଥର ପିପିଲି ପ୍ରବେଶପଥ ଠାରେ ବୁଧବାର ଅପରାହ୍ନରେ ଘଟିଥିବା ଏକ ସଡକ ଦୁର୍ଘଟଣାରେ ଜଣେ ଲୁନା ଚାଳକ ବୃଦ୍ଧ ବ୍ୟକ୍ତି ଗୁରୁତର ଭାବେ ଆହତ ହୋଇଛନ୍ତି । ଚିକିତ୍ସା ଲାଗି ତାଙ୍କୁ ପ୍ରଥମେ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ଅବସ୍ଥା ଅଧିକ ଗୁରୁତର ହେବାରୁ ପରେ ତାଙ୍କୁ  ରାଜଧାନୀ (କ୍ୟାପିଟାଲ) ହସ୍‍ପିଟାଲ୍‍କୁ ସ୍ଥାନାନ୍ତର କରାଯାଇଛି । ଆହତ ବ୍ୟକ୍ତିଙ୍କ ପରିଚୟ ମିଳିନଥିବା ବେଳେ ତାଙ୍କ ଘର ଲକ୍ଷ୍ମୀନାରାୟଣ ପୁର ନିକଟ ନବାଟିଆ ଗ୍ରାମରେ ହୋଇଥିବା ପୁଲିସର ପ୍ରାଥମିକ ତଦନ୍ତରୁ ଜଣାପଡିଛି ।
ପ୍ରାପ୍ତ ସୂଚନା ଅନୁଯାଇ, ଜଣେ ବୟସ୍କ ବ୍ୟକ୍ତି ଏକ ଲୁନାରେ ଜାତୀୟ ରାଜପଥରେ ପିପିଲି ଆସୁଥିବା ବେଳେ ପିପିଲି ଟୋଲଗେଟ୍‍ ନିକଟ ପିପିଲି ପୌରାଞ୍ଚଳର ପ୍ରବେଶପଥ ଠାରେ ପଛରୁ ଦୃତ ଗତିରେ ଆସୁଥିବା ଏକ ଟଭେରା ଗାଡି ତାଙ୍କୁ ଧକ୍କା ଦେଇଥିଲା । ବୃଦ୍ଧଜଣକ ଛିଟିକି ଯାଇ ଉକ୍ତ ଗାଡିରେ ଖୁବ​​‌ଜୋରରେ ପିଟିହୋଇ ରାସ୍ତା ଉପରେ ପଡିଥିବା ବେଳେ ଲୁନାକୁ ଟଭେରା ଗାଡି କିଛିଦୂର ପର୍ଯ୍ୟନ୍ତ ଘୋଷାରି ନେଇଥିଲା । ଉକ୍ତ ବ୍ୟକ୍ତିଙ୍କ ମୁଣ୍ଡରେ ଶକ୍ତ ଆଘାତ ଲାଗିଥିବା ବେଳେ ସେ ଚେତାଶୂନ୍ୟ ହୋଇପଡିଥିଲେ । ଖବରପାଇ ପିପିଲି ଥାନା ଏସ୍‍ଆଇ ସନ୍ଦୀପ ଦାସ, ଏଏସ୍‍ଆଇ ପ୍ରକାଶ କୁମାର ମଲ୍ଲିକ ପ୍ରମୁଖ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆହତ ବ୍ୟକ୍ତିଙ୍କୁ ଉଦ୍ଧାର କରି ଚିକିତ୍ସା ଲାଗି ଡାକ୍ତରଖାନା ପଠାଇବା ସହ ଦୁର୍ଘଟଣାଗ୍ରସ୍ତ ଗାଡି ଦୁଇଟିକୁ ଜବତ କରି ଘଟଣାର ତଦନ୍ତ ଚଳାଇଥିବା ସୂଚନା ମିଳିଛି । ଟଭେରା ଗାଡିର ଡ୍ରାଇଭରକୁ ପୁଲିସ ଥାନାରେ ଅଟକ ରଖିଥିବା ସୂଚନା ମିଳିଛି ।