ନୂଆଦିଲ୍ଲୀ: ପୂର୍ବତନ ଅର୍ଥମନ୍ତ୍ରୀ ପି. ଚିଦାମ୍ବରମଙ୍କୁ ସୁପ୍ରିମକୋର୍ଟରୁ ଝଟ୍କା ମିଳିଛି। ଚିଦାମ୍ବରମଙ୍କ ଆଗୁଆ ଜାମିନ ଆବଦେନକୁ ସୁପ୍ରିମକୋର୍ଟ ସୋମବାର ଖାରଜ କରିଦେବା ସହିତ ଏହା ଉପରେ ଶୁଣାଣି କରିବାକୁ ମନା କରିଦେଇଛନ୍ତି। କୋର୍ଟ କହିଛନ୍ତି ଯେ, ଯଦି କୌଣସି ତଦନ୍ତକାରୀ ସଂସ୍ଥା କୌଣସି ଅଭିଯୁକ୍ତ ବିରୋଧରେ ତଦନ୍ତ କରୁଛି ଏବଂ ତାଙ୍କୁ ଗିରଫ କରୁଛି, ତେବେ ତାଙ୍କର ଆଗୁଆ ଜାମିନ ଆବଦେନ ଆପେ ଆପେ ପ୍ରଭାବହୀନ ହୋଇଯାଇଥାଏ। ଯଦି ଆପଣ ଜାମିନ ଚାହୁଁଛନ୍ତି, ତା’ହେଲେ ସେଥିପାଇଁ ଉପଯୁକ୍ତ କୋର୍ଟକୁ ଯାଆନ୍ତୁ। କୋର୍ଟଙ୍କ ଏହି ନିଷ୍ପତ୍ତି ପରେ ଚିଦାମ୍ବରମଙ୍କ ପାଇଁ ଅଡୁଆ ବଢ଼ିଯାଇଛି। ଫଳରେ ସେ ଏବେ ସିବିଆଇ ହାଜତରେ ରହିବେ।
ସୂଚନାଯୋଗ୍ୟ, ଆଇଏନଏକ୍ସ ମିଡିଆ ଦୁର୍ନୀତି ମାମଲାରେ ଚିଦାମ୍ବରମଙ୍କୁ ସିବିଆଇ ଗତ ୨୧ ତାରିଖରେ ଗିରଫ କରିଥିଲା। ସିବିଆଇ ବ୍ୟତୀତ ପ୍ରବର୍ତ୍ତନ ନିର୍ଦେଶାଳୟ(ଇଡି) ବି ଏହି ମାମଲାର ତଦନ୍ତ କରୁଛି।
