ଦୁବାଇ : ସୋଏବ୍ ମାଲିକ୍ଙ୍କ ପରେ ଆଉ ଜଣେ ପାକିସ୍ତାନୀ କ୍ରିକେଟର ଭାରତୀୟ ଯୁବତୀଙ୍କୁ ବିବାହ କରିଛନ୍ତି। ସେ ହେଉଛନ୍ତି ପାକିସ୍ତାନର ଫାଷ୍ଟବୋଲର ହାସନ୍ ଅଲୀ। ଦୁବାଇରେ ମଙ୍ଗଳବାର ଭାରତୀୟ ଯୁବତୀ ଶାମିଆ ଆର୍ଜୁଙ୍କ ସହ ହାସନ୍ଙ୍କର ବିବାହ ସମ୍ପନ୍ନ ହୋଇଯାଇଛି। ଏହି ବିବାହର ଫଟୋ ଓ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି।
ଟ୍ବିଟରରେ ହାସନ୍ ଅଲୀଙ୍କୁ ଶୁଭେଚ୍ଛା ଜଣାଇଛନ୍ତି ଭାରତୀୟ ଟେନିିସ୍ ତାରକା ସାନିଆ ମିର୍ଜା। ସୋଏବ୍ ମାଲିକ୍ ୨୦୧୦ରେ ସାନିଆଙ୍କୁ ବିବାହ କରିଥିଲେ। ଶୁକ୍ରବାର ହାସନ୍ ଅଲୀଙ୍କ ବିବାହ ଭୋଜି ଅନୁଷ୍ଠିତ ହେବ। ଏହି ଭୋଜିକୁ ହାସନ୍ କିଛି ଭାରତୀୟ କ୍ରିକେଟରଙ୍କୁ ମଧ୍ୟ ନିମନ୍ତ୍ରଣ କରିଛନ୍ତି। ପୂର୍ବ ପ୍ରକାଶିତ ରିପୋର୍ଟ ଅନୁସାରେ, ଶାମିଆ ଆର୍ଜୁ ହେଉଛନ୍ତି ହରିୟାଣାର ମେୱାତ୍ ଜିଲାର ମୂଳବାସିନ୍ଦା। ସେ ହରିୟାଣାର ଫରିଦାବାଦସ୍ଥିତ ମାନବ ରଚନା ବିଶ୍ବବିଦ୍ୟାଳୟରୁ ଏରୋନଟିକାଲ ଇଞ୍ଜିନିୟରିଂ ଡିଗ୍ରୀ ହାସଲ କରିଛନ୍ତି। ପୂର୍ବରୁ ଜେଟ୍ ଏୟାରୱେଜ୍ ପାଇଁ କାମ କରୁଥିବା ଶାମିଆ ଏବେ ୟୁଏଇର ଏମିରେଟ୍ସ ଏୟାରଲାଇନ୍ସରେ ଫ୍ଲାଇଟ୍ ଇଞ୍ଜିନିୟର ଭାବେ କାମ କରୁଛନ୍ତି। ୨୫ ବର୍ଷ ବୟସ୍କ ହାସନ୍ ଅଲୀ ପାକିସ୍ତାନ ପାଇଁ ଗତ ବିଶ୍ବକପ୍ରେ ଖେଳିଥିଲେ।
