ପ୍ରୋଭିଡେନ୍ସ : ଏଠାରେ ଘରୋଇ ୱେଷ୍ଟଇଣ୍ଡିଜ୍ ଓ ଭାରତ ମଧ୍ୟରେ ଗୁରୁବାର ପ୍ରଥମ ଦିନିକିଆ ମ୍ୟାଚ୍ ଖେଳା ଯାଉଥିବା ବେଳେ ଏଥିରେ ବର୍ଷା ବାଧକ ସାଜିଛି। ମ୍ୟାଚ୍ର ନିର୍ଦ୍ଧାରିତ ସମୟର ୫ ଘଣ୍ଟା ବିତି ଯାଇଥିଲେ ସୁଦ୍ଧା ମାତ୍ର ୧୩ ଓଭରର ଖେଳ ସମ୍ଭବପର ହୋଇଛି। ଏହି ୧୩ ଓଭରରେ ୱେଷ୍ଟଇଣ୍ଡିଜ୍ ୧ ୱିକେଟ ହରାଇ ୫୪ ରନ୍ କରିପାରିଛି।
ପ୍ରଥମେ ସକାଳୁ ବର୍ଷା ହେବାରୁ ମ୍ୟାଚ୍ ୨ ଘଣ୍ଟା ପରେ ଆରମ୍ଭ ହୋଇଥିଲା। ଫଳରେ ମ୍ୟାଚ୍କୁ ୪୩ ଓଭରର କରା ଯାଇଥିଲା। ଟସ୍ ଜିତି ଭାରତ ଫିଲ୍ଡିଂ ନେବା ପରେ ୱେଷ୍ଟଇଣ୍ଡିଜ୍ର ଓପ୍ନର ଧିମା ବ୍ୟାଟିଂ କରିଥିଲେ। ୫.୪ ଓଭରରେ ୱେଷ୍ଟଇଣ୍ଡିଜ୍ ବିନା ୱିକେଟରେ ୯ ରନ୍ କରିଥିବା ବେଳେ ପୁଣି ବର୍ଷା ହୋଇଥିଲା। ପରେ ଖେଳ ଆରମ୍ଭ ହୋଇଥିବା ବେଳେ ମ୍ୟାଚ୍କୁ ୪୦ ଓଭରର କରା ଯାଇଥିଲା। ତେବେ ଓଦା ପଡ଼ିଆ ଯୋଗୁଁ ଅମ୍ପାୟାର ଖେଳ ବନ୍ଦ କରି ଦେଇଥିଲେ ଏବଂ ପରେ ଖେଳ ଆରମ୍ଭହେବା ବେଳକୁ ଏହାକୁ ୩୪ ଓଭରର କରା ଯାଇଥିଲା। ୭ମ ଓଭରରୁ ଏଭିନ୍ ଲୁଇସ୍ ଆକ୍ରମଣ ଆରମ୍ଭ କରିଥିଲେ। ଖଲିଲ ଅହମ୍ମଦ ବୋଲିଂ କରିଥିବା ପ୍ରଥମ ଓଭରରେ ତାଙ୍କୁ ୧୫ ରନ୍ ମାରିଥିଲେ ଲୁଇସ୍। ୧୧ଶ ଓଭରରେ ଆଉଟ ହୋଇଥିବା କ୍ରିସ୍ ଗେଲ୍ ୩୧ ବଲ୍ ଖେଳି ମାତ୍ର ୪ ରନ୍ କରିଥିଲେ। ୧୩ ଓଭର ପରେ ଖେଳ ବନ୍ଦରହିବା ବେଳକୁ ୱେଷ୍ଟଇଣ୍ଡିଜ୍ ୧ ୱିକେଟରେ ୫୪ ରନ୍ କରିଛି। ଏଭିନ୍ ଲୁଇସ୍ ୩୬ ବଲ୍ରୁ ୩ଟି ଛକା ଓ ୨ଟି ଚୌକା ସହ ୪୦ ଏବଂ ସାଇ ହୋପ୍ ୧୧ ବଲ୍ରୁ ୬ ରନ୍କରି କ୍ରିଜ୍ରେ ଅଛନ୍ତି।
Comments are closed.