ଭୁବନେଶ୍ବର: ଚାଷ ପାଇଁ ପୋଖରୀ ପାଣିକୁ ନେଇ ଦୁଇ ଗ୍ରାମ ମଧ୍ୟରେ ଗୋଷ୍ଠୀ ସଂଘର୍ଷ ଦେଖିବାକୁ ମିଳିଛି। ଏଥିର ଜଣଙ୍କର ମୃତ୍ୟୁ ହୋଇଥିବା ବେଳେ ଉଭୟ ପକ୍ଷରୁ ୧୦ ଜଣ ଆହତ ହୋଇଛନ୍ତି। ଏହି ଅଭାବନୀୟ ଘଟଣା କଟକ ଜିଲା ନରସିଂହପୁର ଥାନା ଅନ୍ତର୍ଗତ ଚାମୁଣ୍ଡାପଲ୍ଲୀରେ ଘଟିଛି । ସମସ୍ତ ଆହତଙ୍କୁ ନିକଟସ୍ଥ ମେଡ଼ିକାଲରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ, ଚାମୁଣ୍ଡାପଲ୍ଲୀରେ ଥିବା ପୋଖରୀରୁ ଚାଷ ଜମିକୁ ପାଣି ମଡ଼ାଇବାକୁ ନେଇ ସାଗର ଓ ପାଞ୍ଚଗୋଚ୍ଛିଆ ଗ୍ରାମ ମଧ୍ୟରେ ଗତ ଜୁଲାଇ ୨୩ରେ ବିବାଦ ମୁଣ୍ଡ ଟେକିଥିଲା । ଏହାକୁ ନେଇ ଗୋଟିଏ ପକ୍ଷ ଗ୍ରାମବାସୀ ତହସିଲଦାରଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ । ଜୁଲାଇ ୨୫ରେ ତହସିଲଦାର ଉଭୟ ଗ୍ରାମବାସୀଙ୍କୁ ଡକାଇ ଏହି ବିବାଦର ସମାଧାନ କରାଇବାକୁ ଉଦ୍ୟମ କରିଥିଲେ । ହେଲେ ଉଭୟଙ୍କ ଗ୍ରାମ ମଧ୍ୟରେ ଅସନ୍ତୋଷ କମି ନଥିଲା। ଧୀରେ ଧୀରେ ଏହି ବିବାଦ ଉଗ୍ର ରୂପ ନେଇ ରବିବାର ସକାଳେ ଉଭୟ ଗ୍ରାମବାସୀଙ୍କ ମଧ୍ୟରେ ଗୋଷ୍ଠୀ ସଂଘର୍ଷ ହୋଇଥିଲା। ଏଥିରେ ସାଗର ଗାଁର ଶ୍ରୀଧର ସାମଲ ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ଏହା ସହ ଉଭୟଙ୍କ ପକ୍ଷର ୧୦ ଜଣ ବ୍ୟକ୍ତି ଆହତ ହୋଇଛନ୍ତି । ଏସମ୍ପର୍କରେ ଖବର ପାଇ ଘଟଣାସ୍ଥଳରେ ପୁଲିସ ମୃତଦେହକୁ ଜବତ କରିବା ସହ ତଦନ୍ତ ଆରମ୍ଭ କରିଛି । ବର୍ତ୍ତମାନ ସୁଦ୍ଧା ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନ ଲାଗି ରହିଥିବା ବେଳେ ପରିସ୍ଥିତିକୁ ନିୟନ୍ତ୍ରଣଧୀନ ରଖିବା ପାଇଁ ପୁଲିସ ପୋର୍ସ ମୁତୟନ କରାଯାଇଛି ।
