ଅହମଦାବାଦ : ନ୍ୟୁଜ୍ପ୍ରିଣ୍ଟ ଉପରେ ଧାର୍ଯ୍ୟ ୧୦% ଆମଦାନୀ ଶୁଳ୍କ ପ୍ରତ୍ୟାହାର କରିବାକୁ ଭାରତୀୟ ନ୍ୟୁଜ୍ପେପର ସୋସାଇଟି (ଆଇଏନଏସ୍) ଭାରତ ସରକାରଙ୍କୁ ନିବେଦନ କରିଛି। ଗତ ସାଧାରଣ ବଜେଟରେ ସରକାର ନ୍ୟୁଜପ୍ରିଣ୍ଟ, ଅନକୋଟେଡ ପେପର ଓ ପତ୍ରିକା ପାଇଁ ଆବଶ୍ୟକ ଲାଇଟୱେଟ କୋଟେଡ (ଏଲଡବ୍ଲ୍ୟୁସି) ପେପର ଉପରେ ୧୦% ଆମଦାନୀ ଶୁଳ୍କ ଧାର୍ଯ୍ୟ କରିଛନ୍ତି।
ଏକ ପ୍ରେସ ବିବୃତିରେ ଆଇଏନଏସ୍ କହିଛନ୍ତି ଯେ ଖବରକାଗଜ ଓ ପତ୍ରିକା ପ୍ରକାଶକମାନେ ଅନେକ ଆର୍ଥିକ ଦୁଃସ୍ଥିତି ଦେଇଗତି କରୁଛନ୍ତି। ତେଣୁ ନ୍ୟୁଜ୍ପ୍ରିଣ୍ଟ ଉପରେ ଆମଦାନୀ ଶୁଳ୍କ ଲାଗୁ କରାଗଲେ କ୍ଷୁଦ୍ର ଓ ମଧ୍ୟମ ଖବରକାଗଜଗୁଡିକ ଅଧିକ କ୍ଷତିର ସମ୍ମୁଖୀନ ହୋଇ ପ୍ରକାଶନ ବନ୍ଦ କରିବାକୁ ବାଧ୍ୟ ହେବେ। ଭାରତରେ ବାର୍ଷିକ ୨.୫ ନିୟୁତ ଟନ ନ୍ୟୁଜପ୍ରିଣ୍ଟ ଆବଶ୍ୟକ ହୋଇଥାଏ। ଏଥିରୁ ମାତ୍ର ୧ ନିୟୁତ ଟନ ଭାରତରେ ଉତ୍ପାଦନ ହୋଇଥାଏ। ଅନକୋଟେଡ (ଗ୍ଲେଜଡ୍) ଓ ଏଲଡବ୍ଲ୍ୟୁସି ପେପରରେ ଭାରତରେ ଉତ୍ପାଦନ ହୋଇ ନ ଥାଏ। ତେଣୁ ଖବରକାଗଜ ଶିଳ୍ପକୁ ବଞ୍ଚାଇବା ପାଇଁ ସରକାର ଏହି ଶୁଳ୍କ ହ୍ରାସ କରିବା ଜରୁରୀ ବୋଲି ଆଇଏନଏସ୍ କହିଛି।
