ନୂଆଦିଲ୍ଲୀ : ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ପାଇଁ ଗୁରୁବାର ରାଜ୍ୟସଭାରେ ଦାବି ଉଠିଛି। ରାଜ୍ୟସଭାର ଶୂନ୍ୟକାଳରେ ବିଜେଡି ସାଂସଦ ପ୍ରଶାନ୍ତ ନନ୍ଦ ଏହି ଦାବି ଉଠାଇଛନ୍ତି। ସେ କହିଛନ୍ତି ଯେ ସମୁଦ୍ର ତଟବର୍ତ୍ତୀ ରାଜ୍ୟ ଓଡ଼ିଶା ପ୍ରାୟ ସମୟ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି।
ସାମୁଦ୍ରିକ ଝଡ଼, ତୋଫାନ, ବନ୍ୟା ଓ ମରୁଡ଼ି ଭଳି ପ୍ରାକୃତିକ ବିପର୍ଯ୍ୟୟ ଯୋଗୁଁ ଓଡ଼ିଶାବାସୀଙ୍କୁ ଗୁରୁତର ସମସ୍ୟାର ସାମ୍ନା କରିବାକୁ ପଡୁଛି। ୧୯୯୯ ମହାବାତ୍ୟା ପରେ ଓଡ଼ିଶା ଅନେକ ସାମୁଦ୍ରିକ ଝଡ଼ର ସାମ୍ନା କରିଛି। ଏପରିକି ନିକଟରେ ଫନୀ ସାମୁଦ୍ରିକ ଝଡ଼ ରାଜ୍ୟରେ ବହୁ କ୍ଷୟକ୍ଷତି ଘଟାଇଛି। ପ୍ରାକୃତିକ ବିପର୍ଯ୍ୟୟ ଯୋଗୁଁ ଓଡ଼ିଶାର ଭିତ୍ତିଭୂମି ନଷ୍ଟ ହୋଇଯାଉଛି ଓ ସେଗୁଡ଼ିକୁ ପୁନଃ ନିର୍ମାଣ କରିବାକୁ ପଡୁଛି। ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ପାଇଁ ଓଡ଼ିଶାର ସ୍ଥିତି ଅନୁକୂଳ ରହିଛି। ତେଣୁ ଆଦିବାସୀ ବହୁଳ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ପାଇଁ ସେ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି।
