ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବାଧୀନ ନୂତନ ମନ୍ତ୍ରିମଣ୍ଡଳରେ ବିଜେପି ନେତୃତ୍ବାଧୀନ ଏନ୍ଡିଏର ସହଯୋଗୀ ଦଳଗୁଡିକୁ ଗୁରୁତ୍ବ ଦିଆଯିବାର ସମ୍ଭାବନା ରହିଛି। ସୂଚନା ଆନୁସାରେ ବିଶେଷକରି ଜେଡିୟୁକୁ ମନ୍ତ୍ରୀ ପରିଷଦରେ ୨ଟି ଆସନ ମିଳିପାରେ। ଏଥିନେଇ ଜେଡିୟୁ ମୁଖ୍ୟ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ବିଜେପି ସହିତ ପୂର୍ବରୁ ଆଲୋଚନା କରିଛନ୍ତି। ସେହିଭଳି ଏନ୍ଡିଏର ଅନ୍ୟତମ ପ୍ରମୁଖ ସହଯୋଗୀ ଶିବସେନା ମଧ୍ୟ ମନ୍ତ୍ରୀ ପରିଷଦରେ ୨ ଆସନ ଲାଭ କରିବାକୁ ଆଶା ବାନ୍ଧିଛି। କିନ୍ତୁ ବର୍ତ୍ତମାନ ସୁଦ୍ଧା ଉଭୟ ଦଳକୁ କେବଳ ଗୋଟିଏ ଲେଖାଏଁ ମନ୍ତ୍ରୀ ପଦ ଦେବାକୁ ପ୍ରତିଶ୍ରୁତି ମିଳିଥିବା ଜଣାପଡିଛି। ସେହିଭଳି ରାମ ବିଳାଶ ପାଶ୍ବାନଙ୍କ ଲୋକ ଜନଶକ୍ତି ପାର୍ଟି (ଏଲଜେପି)କୁ ଗୋଟିଏ ଆସନ ମିଳିବାର ସମ୍ଭାବନା ରହିଛି। ଅନ୍ୟପଟେ ଏଆଇଏଡିଏମକେ ମଧ୍ୟ ମନ୍ତ୍ରିମଣ୍ଡଳରେ ସମିଲ ହୋଇପାରେ। ରାଜସ୍ଥାନରୁ ଗଜେନ୍ଦ୍ର ସିଂହ ଶେଖାୱତ, ରାଜ୍ୟବର୍ଦ୍ଧନ ସିଂହ ରାଠୋର, ସିପି ଯୋଶୀ ଏବଂ ଯଶକୌର ମୀନାଙ୍କୁ ମନ୍ତ୍ରୀ ପଦ ମିଳିପାରେ ବୋଲି କୁହାଯାଉଛି। ତେବେ ସପ୍ତଦଶ ଲୋକସଭା ନିର୍ବାଚନରେ ଓଡ଼ିଶା ଓ ପଶ୍ଚିମବଙ୍ଗରେ ବିଜେପିର ଭୋଟ ପ୍ରତିଶତ ନାଟକୀୟ ଢଙ୍ଗରେ ବୃଦ୍ଧି ପାଇଥିବାରୁ ମନ୍ତ୍ରୀ ପରିଷଦ ଗଠନ ବେଳେ ଏହି ଦୁଇ ରାଜ୍ୟକୁ ଅଧିକ ଗୁରୁତ୍ବ ଦିଆଯିବ। ମନ୍ତ୍ରିମଣ୍ଡଳରେ ଦୁଇ ରାଜ୍ୟର ଅଧିକ ପ୍ରତିନିଧି ରହିବାର ସମ୍ଭାବନା ରହିଛି। ନୂତନ କ୍ୟାବିନେଟରେ କେତେକ ନୂଆମନ୍ତ୍ରୀଙ୍କୁ ଦେଖିବାକୁ ମଳିବ। ମନ୍ତ୍ରିମଣ୍ଡଳ ଗଠନ ବେଳେ ନେତାମାନଙ୍କର ପ୍ରଶାସନିକ ଦକ୍ଷତାକୁ ଦୃଷ୍ଟି ଦିଆଯିବ। ଗତଥର ଉନ୍ନତ ପ୍ରଦର୍ଶନ କରି ନ ଥିବା ମନ୍ତ୍ରୀ ମନ୍ତିମଣ୍ଡଳରୁ ବାଦ ପଡିବାର ସମ୍ଭାବନା ରହିଛି। ଏହି କ୍ରମରେ ରାଧା ମୋହନ ସିଂହଙ୍କ ନାମ ସର୍ବାଗ୍ରେ ରହିଥିବା ଜଣାପଡିଛି।
Popular Categories
Previous article
Next article