କଲମ୍ବୋ,୨୯ା୪: ଖ୍ରୀଷ୍ଟିଆନ୍ମାନେ ଇଷ୍ଟର ରବିବାର ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବେ ନାହିଁ। ବହୁ ସଂଖ୍ୟାରେ ଖ୍ରୀଷ୍ଟ ଧର୍ମାବଲମ୍ବୀ ଏହି ପବିତ୍ର ଦିବସରେ ପ୍ରାର୍ଥନା ପାଇଁ ଚର୍ଚ୍ଚକୁ ଆସିଥିବାବେଳେ ଇସ୍ଲାମିକ ଆତଙ୍କବାଦୀଙ୍କ ଶିକାର ହୋଇଥିଲେ ମଧ୍ୟ ଚର୍ଚ୍ଚ ମୁସଲମାନଙ୍କ ବିରୋଧରେ କୌଣସି ଆକ୍ରୋଶ ରଖି ନାହିଁ ବୋଲି ସୋମବାର ଘୋଷଣା କରାଯାଇଛି। ଆକ୍ରମଣ ଘଟଣାର ସପ୍ତାହକ ପରେ ସୋମବାର ଏଭଳି ପ୍ରତିକ୍ରିୟା ରଖିଛନ୍ତି କଲମ୍ବୋ ଆର୍କବିଶପ୍ କାର୍ଡିନାଲ ମାଲକମ୍ ରଞ୍ଜିତ। ଏହି ଘଟଣାରେ ଖ୍ରୀଷ୍ଟିଆନ୍ମାନେ ଆଇନକୁ ନିଜ ହାତକୁ ନେବେ ନାହିଁ ବୋଲି ସେ କହିଛନ୍ତି; ତେବେ ସେ ଇସ୍ଲାମିକ ଆତଙ୍କବାଦୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସରକାରଙ୍କୁ ନିବେଦନ କରିଛନ୍ତି। ସରକାର ଅଦ୍ୟାବଧି ଗ୍ରହଣ କରିଥିବା ତଦନ୍ତ ଓ କାର୍ଯ୍ୟାନୁଷ୍ଠାନରେ ବିଶପ ଅସନ୍ତୋଷ ପ୍ରକାଶ କରିଛନ୍ତି। ଯୁଦ୍ଧ ଭଳି ଯୋଜନାବଦ୍ଧ ଭାବେ ସମସ୍ତ ସୁରକ୍ଷାକର୍ମୀଙ୍କୁ କାର୍ଯ୍ୟାନୁଷ୍ଠାନରେ ସାମିଲ କରିବା ସହ ଭବିଷ୍ୟତରେ ଯେମିତି ଏଭଳି ଆକ୍ରମଣର ପୁନରାବୃତ୍ତି ନ ଘଟେ ତାହା ନିଧାର୍ଯ୍ୟ କରିବା ଆବଶ୍ୟକ ବୋଲି ସେ କହିଛନ୍ତି। ଉଲ୍ଲେଖଯୋଗ୍ୟ ଯେ ଶ୍ରୀଲଙ୍କା ସରକାର ଦେଶରେ ବୁର୍ଖା ବ୍ୟବହାରକୁ ନିଷିଦ୍ଧ ଘୋଷଣା କରିଛନ୍ତି। ମୁସଲମାନ ମହିଳାମାନେ ବୁର୍ଖା ପିନ୍ଧି ସର୍ବସାଧାରଣ ସ୍ଥାନକୁ ଯାଇପାରିବେ ନାହିଁ ବୋଲି କୁହାଯାଇଛି।
Popular Categories
Previous article
Next article