ନୂଆଦିଲ୍ଲୀ: ଏଣିକି ସବୁ ରାଜନୈତିକ ଦଳ ନିଜର ପାଣ୍ଠି ସମ୍ପର୍କିତ ତଥ୍ୟ ପ୍ରଦାନ କରିବେ। ନିର୍ବାଚନ ଆୟୋଗଙ୍କ ନିକଟରେ ଦଳଗୁଡ଼ିକ ନିର୍ବାଚନୀ ବଣ୍ଡ ବା ଇଲେକ୍ଟୋରାଲ ବଣ୍ଡ୍ ଦାଖଲ କରିବେ ବୋଲି ସୁପ୍ରିମକୋର୍ଟ ଶୁକ୍ରବାର ନିର୍ଦେଶ ଦେଇଛନ୍ତି। ଦଳଗୁଡ଼ିକ ଆସନ୍ତା ମେ ୧୫ ତାରିଖ ସୁଦ୍ଧା ମିଳିଥିବା ସମସ୍ତ ପାଣ୍ଠି ସମ୍ପର୍କରେ ଜଣାଇବେ। ଦାନ ଦେଉଥିବା ବ୍ୟକ୍ତିଙ୍କ ପରିଚୟ ଏବଂ ବ୍ୟାଙ୍କ ଜମାଖାତାରେ ଥିବା ଟଙ୍କା ସମ୍ପର୍କିତ ତଥ୍ୟ ଏକ ଜଉମୁଦ ଲଫାଫାରେ ଆସନ୍ତା ମେ ୩୦ ତାରିଖ ସୁଦ୍ଧା ନିର୍ବାଚନ ଆୟୋଗଙ୍କୁ ହସ୍ତାନ୍ତର କରିବାକୁ ସର୍ବୋଚ୍ଚ ନ୍ୟାୟାଳୟ ଆଦେଶ ଦେଇଛନ୍ତି।
ସୁପ୍ରିମକୋର୍ଟ କହିଛନ୍ତି, ପରବର୍ତ୍ତୀ ନିର୍ଦେଶ ପର୍ଯ୍ୟନ୍ତ ନିର୍ବାଚନ ଆୟୋଗ ସମସ୍ତ ତଥ୍ୟ ବନ୍ଦ ଲଫାଫାରେ ରଖିବେ। ଏହା ମଧ୍ୟରେ ଆଇନରେ କରାଯାଇଥିବା ପରିବର୍ତ୍ତନ ଉପରେ କୋର୍ଟ ବିସ୍ତୃତ ଭାବେ ପରୀକ୍ଷଣ କରିବେ। ସୂଚନାଯୋଗ୍ୟ, ଇଲେକ୍ଟୋରାଲ ବଣ୍ଡ୍ର ବୈଧତାକୁ ଚ୍ୟାଲେଞ୍ଜ କରି ଏକ ଏଡିଆର ନାମକ ଏକ ଏନଜିଓ ପକ୍ଷରୁ ସୁପ୍ରିମକୋର୍ଟରେ ମାମଲା ରୁଜୁ କରାଯାଇଥିଲା। ନିର୍ବାଚନ ପ୍ରକ୍ରିୟାକୁ ସ୍ବଚ୍ଛ କରିବା ପାଇଁ ରାଜନୈତିକ ଦଳଗୁଡ଼ିକୁ କେଉଁମାନେ ଚାନ୍ଦା ଦେଉଛନ୍ତି ତାହା ଜାଣିବା ଜରୁରୀ। କାରଣ ସରକାରରେ ରହିଥିବା ଦଳକୁ ଅଧିକ ଚାନ୍ଦା ମିଳୁଛି ବୋଲି ଆବେଦନକାରୀ ଦର୍ଶାଇଥିଲେ। କୋର୍ଟ ମାମଲାର ଶୁଣାଣି କରି ରାୟ ସଂରକ୍ଷିତ ରଖିଥିଲେ।
