ମୀରଟ: କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀଙ୍କ ପୋଷାକ ପରିଧାନକୁ ନେଇ ଅଶାଳୀନ ମନ୍ତବ୍ୟ ଦେଇଛନ୍ତି ଜଣେ ବିଜେପି ନେତା। ଉତ୍ତରପ୍ରଦେଶର ମୀରଟଠାରେ ଆୟୋଜିତ ଏକ ସଭାରେ ଉଦବୋଧନ ଦେବା ଅବସରରେ ବିଜେପି ନେତା ଜୟକରଣ ଗୁପ୍ତା ପ୍ରିୟଙ୍କାଙ୍କୁ ତାତ୍ସଲ୍ୟ କରି କହିଥିଲେ, ଦେଶରେ ଅଚ୍ଛେଦିନ(ଭଲ ଦିନ) ଆସିଲାଣି କି ନାହିଁ ସେ ନେଇ ସେ କେବଳ ପ୍ରଶ୍ନ କରି ଜାଣନ୍ତି। କଂଗ୍ରେସର ସବୁ ନେତାମାନେ ବଡ଼ ପାଟିରେ ଚିତ୍କାର କରୁଛନ୍ତି ଅଚ୍ଛେଦିନ ଆସିଲାଣି ? ଅଚ୍ଛେଦିନ ଆସିଲାଣି ? କିନ୍ତୁ ସେମାନଙ୍କୁ ଅଚ୍ଛେଦିନ ଦେଖାଯାଉନାହିଁ। ଯିଏ ସ୍କର୍ଟ ପିନ୍ଧୁଥିଲେ ସେ ଏବେ ଶାଢ଼ି ପିନ୍ଧି ମନ୍ଦିରରେ ପୂଜାର୍ଚ୍ଚନା କରୁଛନ୍ତି। ଦିନେ ସେ ଗଙ୍ଗାଜଳଠାରୁ ଦୂରେଇ ରହୁଥିଲେ, ଏବେ ସେହି ପବିତ୍ର ଜଳ ଗ୍ରହଣ କରୁଛନ୍ତି। ଏହା କ’ଣ ଅଚ୍ଛେଦିନ ନୁହେଁ ବୋଲି ଗୁପ୍ତା ପ୍ରଶ୍ନ କରିଥିଲେ। ତେବେ ଗୁପ୍ତାଙ୍କ ଏହି ମନ୍ତବ୍ୟ ସମଗ୍ର ନାରୀ ଜାତି ପାଇଁ ଅପମାନ ବୋଲି ସାଧାରଣରେ ମତପ୍ରକାଶ ପାଇଛି।
ପ୍ରିୟଙ୍କାଙ୍କ ଉପରେ ଏପରି ବିଦ୍ରୂପ ମନ୍ତବ୍ୟ ଦେବା ଘଟଣା ପ୍ରଥମ ନୁହେଁ। ଗତ ସପ୍ତାହରେ ଶିଆ ୱାକଫ ବୋର୍ଡର ମୁଖ୍ୟ ୱାସିମ ରିଜଭୀ ମଧ୍ୟ ଅନୁରୂପ ଏକ ମନ୍ତବ୍ୟ ଦେଇଥିଲେ। ସେ ପ୍ରିୟଙ୍କାଙ୍କ ଉଦ୍ଦେଶ୍ୟରେ କହିଥିଲେ, ତାଙ୍କ ମୁଖମଣ୍ଡଳ ଅତ୍ୟନ୍ତ ସୁନ୍ଦର। ସେ ରାଜନୀତିରେ ରହିବା ଉଚିତ ନୁହେଁ। ସେ ଯଦି ଚାହିଁଥାନ୍ତେ ଆମେ ତାଙ୍କୁ ‘ରାମ ଜନ୍ମଭୂମି’ ଚଳଚ୍ଚିତ୍ରରେ ଜାଫର ଖାନର ବୋହୂ ଭୂମିକାରେ ଅଭିନୟ କରିବାକୁ ସୁଯୋଗ ଦେଇଥାନ୍ତୁ।
