ଘସିପୁରା : ପାରିବାରିକ କଳହରୁ ବଡ ଭାଇର ତୀର ମାଡ଼ରେ ସାନ ଭାଇ ଗୁରୁତର ହୋଇଛି । ପ୍ରଥମେ ଆନନ୍ଦପୁର ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଛି ।
ସୂଚନାଯୋଗ୍ୟ, ଆନନ୍ଦପୁର ଥାନା ଅନ୍ତର୍ଗତ ଦୁଡୁ ଗାଁର ମୁନା ବେହେରା (୩୦) ଶନିବାର ବିଳମ୍ବିତ ରାତିରେ ମଦ୍ୟପାନ କରି ଘରକୁ ଫେରିଥିଲା । ନିଶାଗ୍ରସ୍ତ ଅବସ୍ଥାରେ ମୁନା ଘରେ ଥିବା ଛୋଟ ପିଲାମାନଙ୍କୁ ମାରିବାକୁ ଉଦ୍ୟମ କରୁଥିବା ବେଳେ ବଡ ଭାଇ ରାଜଶ୍ରୀ ବେହେରା ତାଙ୍କୁ ଅଟକାଇ ଥିଲେ । ଏଥିରେ ମୁନା ଅଧିକ ଉତକ୍ଷିପ୍ତ ହୋଇ ରାଜଶ୍ରୀକୁ ଆକ୍ରମଣ କରିଥିଲା । ପରେ ରାଜଶ୍ରୀ ପ୍ରତିହଂସା ପରାୟଣ ହୋଇ ସାନ ଭାଇ ମୁନାକୁ ପଛପଟୁ ଧନୁତୀର ମାଡ଼ କରିଥିଲା । ଫଳରେ ତୀରଟି ମୁନାର ପିଠିରେ ଗଳି ଯାଇଥିଲା । ପରିବାର ଲୋକ ମୁନାକୁ ପ୍ରଥମେ ଆନନ୍ଦପୁର ଡାକ୍ତରଖାନା ନେଇଥିଲେ । ସେଠାରେ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଥିବା ଜଣାଯାଇଛି । ଆନନ୍ଦପୁର ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।
