କୋଲକାତା: ଆଇପିଏଲ-୨୦୧୯ର ୬ଷ୍ଠ ମ୍ୟାଚରେ କୋଲକାତା ନାଇଟ ରାଇଡର୍ସ ୨୮ ରନରେ କିଙ୍ଗ୍ସ ଏକାଦଶ ପଞ୍ଜାବକୁ ହରାଇଦେଇଛି। ବୁଧବାର ଇଡେନ ଗାର୍ଡେନ ଗ୍ରାଉଣ୍ଡରେ ଅନୁଷ୍ଠିତ ଏହି ମ୍ୟାଚରେ କୋଲକାତା ପ୍ରଥମେ ବ୍ୟାଟିଂ କରି ୨୦ ଓଭରରେ ୨୧୮ ରନ୍ କରିଥିଲା। ଜବାବରେ ଲଢ଼ୁଆ ପ୍ରଦର୍ଶନ କରିବା ସତ୍ବେ ପଞ୍ଜାବ ୨୦ ଓଭରରେ ୧୯୦ ରନ କରିବାକୁ ସକ୍ଷମ ହୋଇଥିଲା।
ପ୍ରଥମେ ବ୍ୟାଟିଂ କରିଥିବା କୋଲକାତା ଆକ୍ରମଣାତ୍ମକ ଢଙ୍ଗରେ ଖେଳ ଆରମ୍ଭ କରିଥିଲା। ତେବେ ୩୬ ରନରେ ଦଳ ୨ ଓପନର କ୍ରିସ୍ ଲାଇନ ଏବଂ ସୁନୀଲ ନାରିନଙ୍କ ଉଇକେଟ ହରାଇଥିଲା। କିନ୍ତୁ ଏହାପରେ ରବିନ ଉତ୍ଥାପା ଏବଂ ନିତିଶ ରାଣା ଧୂଆଁଧାର ବ୍ୟାଟିଂ କରିଥିଲେ। ଉତ୍ଥାପା ୫୦ ବଲରୁ ୬୭ ଏବଂ ରାଣା ୩୪ ବଲରୁ ୬୩ ରନ୍ କରି ବଡ଼ ଭାଗିଦାରି କରିଥିଲେ। ତେବେ ଶେଷରେ ଆନ୍ଦ୍ରେ ରସେଲ ମାତ୍ର ୧୭ ବଲରେ ୪୮ ରନ ହାସଲ କରି ଦଳକୁ ଏକ ବିରାଟ ସ୍କୋର ଭେଟି ଦେଇଥିଲେ। ଦଳ ୨୦ ଓଭରରେ ୪ ଉଇକେଟ ହରାଇ ୨୧୮ ରନ କରିଥିଲା।
୨୧୯ ରନର ବିଜୟ ଲକ୍ଷ୍ୟକୁ ପିଛା କରି ପଞ୍ଜାବ ଭଲ ଆରମ୍ଭ କରିଥିଲା। କିନ୍ତୁ ପ୍ରାରମ୍ଭରୁ ନିୟମିତ ବ୍ୟବଧାନରେ ୩ଟି ଉଇକେଟ ହରାଇବାରୁ ରନ୍ ଚେଜ କରିବାରେ ସମସ୍ୟା ହୋଇଥିଲା। ଦଳର ଷ୍ଟାର ପ୍ଲେୟାର କ୍ରିସ୍ ଗେଲ ମାତ୍ର ୨୦ ରନ୍ କରି ଆଉଟ ହୋଇଯିବା ପରେ ମୟଙ୍କ ଅଗ୍ରୱାଲ ଇନିଂସ ସମ୍ଭାଳିଥିଲେ। ସେ ୩୪ ବଲ ଖେଳି ୫୮ ରନ୍ ସଂଗ୍ରହ କରି ଆଉଟ ହୋଇଥିଲେ। ଏହା ପରେ ଡେଭିଡ ମିଲର ଏବଂ ମନଦୀପ ସିଂହ ପ୍ରଭାବୀ ପ୍ରଦର୍ଶନ କରିଥିଲେ ହେଁ ବିଜୟ ଲକ୍ଷ୍ୟ ହାସଲ କରିପାରି ନ ଥିଲେ। ମିଲର ୪୦ ବଲରେ ୫୯ ଏବଂ ମନଦୀପ ୧୫ ବଲରେ ୩୩ ରନ୍ କରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଦଳ ୪ ଉଇକେଟ ହରାଇ ୧୯୦ ରନ କରିପାରିଥିଲା।
କୋଲକାତାର ଆନ୍ଦ୍ରେ ରସେଲଙ୍କୁ ମ୍ୟାନ୍ ଅଫ ଦ ମ୍ୟାଚ ବିବେଚିତ କରାଯାଇଥିଲା।
