ଲାହୋର : ପାକିସ୍ତାନ ସୁପ୍ରିମକୋର୍ଟଙ୍କ ନିର୍ଦେଶ ଅନୁସାରେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କୁ ବୁଧବାରଠାରୁ ୩ ମାସ ପାଇଁ ଜାମିନ ମିଳିଛି । ସ୍ୱାସ୍ଥ୍ୟଗତ ସମସ୍ୟା ଦେଇ ଗତି କରୁଥିବା ନୱାଜଙ୍କୁ ଚିକିତ୍ସା ପାଇଁ ପାକିସ୍ତାନ ସୁପ୍ରିମକୋର୍ଟ ୬ ସପ୍ତାହର ଜାମିନ ଦେଇଥିଲେ । କୋର୍ଟଙ୍କ ନିର୍ଦେଶର ଗୋଟିଏ ଦିନ ପରେ ବୁଧବାର ୬୯ ବର୍ଷିୟ ନୱାଜ ସରିଫଙ୍କୁ ଲାହୋରର କୋଟ ଲାଖପାଟ ଜେଲରୁ ମୁକ୍ତ କରାଯାଇଛି । ଦୁର୍ନୀତି ଅଭିଯୋଗରେ ତାଙ୍କୁ ୭ ବର୍ଷ ଜେଲ ଦଣ୍ଡ ହୋଇଥିବାବେଳେ ଗତ ବର୍ଷ ଡିସେମ୍ବରରୁ ସେ ଜେଲରେ ଥିଲେ ।
ପାକିସ୍ତାନ ମୁସଲିମ ଲିଗ ନୱାଜ (ପିଏମଏଲ-ଏନ) ପ୍ରତିଷ୍ଠାତା ନୱାଜ ସରିଫ ସପ୍ତାହକ ମଧ୍ୟରେ ୪ ଥର ହୃଦ୍ଘାତର ଶିକାର ହୋଇଛନ୍ତି । ପାକିସ୍ତାନ ସୁପ୍ରିମକୋର୍ଟର ପ୍ରଧାନ ବିଚାରପତି ଆସିଫ ସୟିଦ ଖୋସାଙ୍କ ନେତୃତ୍ୱରେ ଗଠିତ ୩ ଜଣିଆ ଖଣ୍ଡପୀଠ ମଙ୍ଗଳବାର ନୱାଜ ସରିଫଙ୍କ ଚିକିତ୍ସା ପାଇଁ ୩ ମାସ ଜାମିନ ପ୍ରଦାନ କରିଥିଲେ । ତେବେ ଚିକିତ୍ସା ପାଇଁ ତାଙ୍କୁ ଦେଶ ବାହାରକୁ ଯିବାକୁ ଅନୁମତି ମିଳିନାହିଁ । ବୁଧବାର ତାଙ୍କୁ ଦେଖିବା ପାଇଁ ଜେଲ ବାହାରେ ସହସ୍ରାଧିକ ଦଳୀୟ କର୍ମୀ ଓ ସମର୍ଥକ ଏକାଠି ହୋଇଥିଲେ । ଜେଲରୁ ବାହାରିବା ପରେ ତାଙ୍କୁ ଶୋଭାଯାତ୍ରାରେ ବାସଭବନ ପର୍ଯ୍ୟନ୍ତ ନିଆଯାଇଥିଲା ।
