ନୂଆଦିଲ୍ଲୀ: ଭାରତୀୟ ବାୟୁସେନାର ୱିଙ୍ଗ କମାଣ୍ଡର ଅଭିନନ୍ଦନ ବର୍ଦ୍ଧମାନଙ୍କୁ ଭାରତକୁ ଫେରାଇ ଦେଇଥିବାରୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନୋବେଲ ଶାନ୍ତି ପୁରସ୍କାର ପ୍ରଦାନ କରିବାକୁ ଦାବି ଉଠିଛି। ଏ ନେଇ ପାକିସ୍ତାନ ସଂସଦରେ ପ୍ରସ୍ତାବ ଆଗତ କରାଯାଇଛି।
ଅଭିନନ୍ଦନ ପାକ୍ ବାୟୁସେନାର ଲଢୁଆ ଯୁଦ୍ଧ ବିମାନ ଏଫ-୧୬କୁ ଆକ୍ରମଣ କରି ଖସାଇ ଦେବା ପରେ ନିଜେ ପାକିସ୍ତାନରେ ଖସିପଡ଼ିଥିଲେ। ପାକ୍ ସେନା ତାଙ୍କୁ ଅଟକ ରଖିଥିଲା। ଏହାପରେ ଭାରତ ଏବଂ ବିଶ୍ଵ ସମୁଦାୟର ପ୍ରବଳ ଚାପ ଯୋଗୁ ଇମ୍ରାନ ଅଭିନନ୍ଦନଙ୍କୁ ଭାରତକୁ ଫେରାଇଥିଲେ। ମାତ୍ର ସେ ଅଭିନନ୍ଦନଙ୍କୁ ଫେରସ୍ତ ପ୍ରକ୍ରିୟାକୁ ଏଭଳି ଆୟୋଜନ କରିଥିଲେ ଯେ ଯେପପି ସେ ଶାନ୍ତି ଚାହୁଁଥିବା ବାର୍ତ୍ତା ଦେଇଥିଲେ। ଏହା ପରେ ପାକିସ୍ତାନ ସଂସଦରେ ଏକ ପ୍ରସ୍ତାବ ଆଗତ ହୋଇଛି। ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ହ୍ରାସ କରିବା ଏବଂ ଯୁଦ୍ଧ ପରିସ୍ଥିତିକୁ ପ୍ରଶମିତ କରିଥିବାରୁ ଇମ୍ରାନଙ୍କୁ ନୋବେଲ ଶାନ୍ତି ପୁରସ୍କାର ଦିଆଯିବା ଉଚିତ ବୋଲି ପ୍ରସ୍ତାବରେ ଦାବି କରାଯାଇଛି।
ତେବେ ଇମ୍ରାନ ଏହା ଉପରେ ମତ ରଖି କହିଛନ୍ତି, ନୋବେଲ ପୁରସ୍କାର ପାଇଁ ସେ ଯୋଗ୍ୟ ନୁହନ୍ତି। ଯିଏ କାଶ୍ମୀରୀବାସୀଙ୍କ ଇଚ୍ଛା ଅନୁସାରେ କାଶ୍ମୀର ସମସ୍ୟାର ସମାଧାନ କରିବ ତାଙ୍କୁ ହିଁ ନୋବେଲ ପୁରସ୍କାର ଦିଆଯାଉ। ଏହି ସମସ୍ୟାର ସମାଧାନ ହେଲେ କାଶ୍ମୀରରେ ଶାନ୍ତି ଆଉ ବିକାଶ ଫେରିବ।
