ଗୁରୁଡିଝାଟିଆ: ଅବକାରୀ ଓ ଜଙ୍ଗଲ ବିଭାଗର ମିଳିତ ଚଢାଉ ଫଳରେ ଶନିବାର ୨୨୦୫ ଲିଟର ଦେଶୀ ମଦ ଜବତ କରାଯାଇଥିବା ବେଳେ ୧୮୩୦୫ ଲିଟର ପୋଚ ନଷ୍ଟ କରାଯାଇଛି। ଖୁଣ୍ଟୁଣୀ ଥାନା ଅନ୍ତର୍ଗତ ଡାଳୁଆ ଓ ଖଣ୍ଡୁଆଳି ଗାଁ ନିକଟସ୍ଥ ଜଙ୍ଗଲରେ ଏହି ଚଢ଼ାଉ କରାଯାଇଛି।
ଜିଲ୍ଲା ଅବକାରୀ ବିଭାଗର ମିଳିତ ଦଳ, ଭୁବନେଶ୍ୱର ଅବକାରୀ ୟୁନିଟ ଓ ସ୍ଥାନୀୟ ଖୁଣ୍ଟୁଣୀ ବନାଞ୍ଚଳ ପକ୍ଷରୁ ମିଳିତ ଭାବେ ବେଆଇନ ଚୋରା ଦେଶୀ ମଦ ଭାଟି ଉପରେ ଚଢାଉ କରାଯାଇଥିଲା। ବନାଞ୍ଚଳ ଅଧିକାରୀ ନୀଳମାଧବ ସାହୁ,ଅବକାରୀ ଉପ ଅଧିକ୍ଷକ ସିଏଚ ତିରୁପତି, ଅବକାରୀ ନିରୀକ୍ଷକ ରବି ନାରାୟଣ ପ୍ରଧାନ, ଅରୁଣ ଭୋଇ, ବଲବୀର ସିଂହ ଓ ସୌମ୍ୟ ରଞ୍ଜନ ମାଝୀ ପ୍ରମୁଖ ଚଢ଼ାଉରେ ଅଂଶଗ୍ରହଣ କରିଥିଲେ। ଅବକାରୀ ଚଢାଉରେ ଚୋରା ମଦ ଜବତ ସହ ପୋଚ ନଷ୍ଟ କରାଯାଇଛି। ହେଲେ କୌଣସି ମାଫିଆଙ୍କୁ ଗିରଫ କରାଯାଇ ପାରି ନାହିଁ। ଯାହାଫଳରେ ଏହି ଚଢାଉ ଲୋକ ଦେଖାଣିଆ ବୋଲି ସାଧାରଣରେ ଆଲୋଚନା ହେଉଛି। ବିଭାଗର ପାରିବା ପଣିଆ ପ୍ରତି ଆଙ୍ଗୁଳି ନିର୍ଦ୍ଦେଶ ହେଉଛି।
