ସମାଜ ଡିଜିଟାଲ ଡେସ୍କ: ପ୍ରେମ ପ୍ରତାରଣାରୁ ଜୀବନ ହାରିଛନ୍ତି ଜଣେ ବିଏସସି ନର୍ସିଂ ଛାତ୍ରୀ। ଘଟଣାଟି ଘଟିଛି ମାଲକାନଗିରି ଜିଲା ଏମଭି-୩୬ ଅଞ୍ଚଳରେ। ପୁରୁଷ ବନ୍ଧୁଙ୍କଠାରୁ ପ୍ରତାରଣାର ଶିକାର ହେବା ପରେ ଛାତ୍ରୀ ଜଣକ ଔଷଧ ବଟିକା ଖାଇ ଆତ୍ମହତ୍ୟା ଉଦ୍ୟମ କରିଥିଲେ। କିନ୍ତୁ ତୁରନ୍ତ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯିବାରୁ ତାଙ୍କ ଜୀବନ ରକ୍ଷା ପାଇଯାଇଥିଲା।
ଗତ ବୁଧବାର ତାଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଥିଲା। ସେ ସୁସ୍ଥ ହୋଇ ଘରକୁ ଫେରିଥିଲେ। ହେଲେ ଗୁରୁବାର ଦିନ ଛାତ୍ରୀ ଜଣକ ପୁନର୍ବାର ଘରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ଯୁବତୀ ଜଣକ ଫାଶୀ ଲଗାଇ ଝୁଲିପଡ଼ିବା ପରେ ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଇଥିଲା। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ସେ ଭଲ ପାଉଥିବା ପୁଅ ଘରର ସମସ୍ତ ସଦସ୍ୟ ତାଙ୍କୁ ବୋହୂ କରିବାକୁ ପ୍ରତିଶ୍ରୁତି ଦେଇ ପରେ ପ୍ରତାରଣା କରିଥିବା ଛାତ୍ରୀଙ୍କ ପରିବାର ଅଭିଯୋଗ କରିଛନ୍ତି। ଅଭିଯୁକ୍ତ ଯୁବକକୁ ଫାଶୀ ଦଣ୍ଡ ଦେବାକୁ ଛାତ୍ରୀଙ୍କ ବାପା ଦାବି କରିଛନ୍ତି।
