ପାଟନା: ବିହାରର ରକ୍ସଲରୁ ସମସ୍ତିପୁର ଯାଉଥିବା ଏକ ଏକ୍ସପ୍ରେସ ଟ୍ରେନ୍ର ସ୍ଲିପର ବଗିରେ ପୋଷା କୁକୁରକୁ ଚେନ୍ରେ ବନ୍ଧା ଯାଇଥିବା ଘଟଣା ଯାତ୍ରୀଙ୍କ ମଧ୍ୟରେ ପ୍ରବଳ ଅସନ୍ତାଷ ସୃଷ୍ଟି କରିଛି। ଫଳରେ ଉକ୍ତ ଟ୍ରେନ୍ଟି ଏକ ଘଣ୍ଟା ବିଳମ୍ବରେ ଷ୍ଟେସନ ଛାଡିଥିବା ଜଣାପଡିଛି। ଯାତ୍ରୀମାନେ ନିଜ ସିଟ୍କୁ ଯିବାରେ ଭୟ ପାଇଥିବାବେଳେ ଉକ୍ତ ବଗିରୁ କୁକୁରକୁ ହଟାଇବାକୁ ରେଳ କର୍ମଚାରୀଙ୍କ ସମସ୍ତ ଉଦ୍ୟମ ମଧ୍ୟ ବିଫଳ ହୋଇଥିଲା। ସୂଚନା ମୁତାବକ ଉକ୍ତ ଟ୍ରେନଟି ସୋମବାର ସକାଳ ୬ଟା ୫୦ ମିନିଟରେ ରକ୍ସଲ ଷ୍ଟେସନରୁ ଯାତ୍ରାରମ୍ଭ କରିବା କଥା। ସମୟ ନିର୍ଘଣ୍ଟ ଅନୁଯାୟୀ ଯାତ୍ରୀମାନେ ଠିକଣା ସମୟରେ ଷ୍ଟେସନରେ ପହଞ୍ଚିଥିଲେ।
ତେବେ ବଗିକୁ ପ୍ରବେଶ କରିବା ମାତ୍ରେ ଚେନ୍ରେ ବନ୍ଧା ଯାଇଥିବା କୁକୁର ଉପରେ ସେମାନଙ୍କର ଦୃଷ୍ଟି ପଡିଥିଲା। ଯାତ୍ରୀଙ୍କୁ ଦେଖି କୁକୁର ଜୋରରେ ଭୁକିବା ଏବଂ ସେମାନଙ୍କୁ କାମୁଡିବାକୁ ଉଦ୍ୟମ କରିବାରୁ ସ୍ଥିତି ଅଧିକ ଜଟିଳ ହୋଇପଡିଥିଲା। ଶେଷରେ ଉକ୍ତ ଖାଲି ବଗି ସହ ଟ୍ରେନ୍ଟି ସକାଳ ୮ଟା ୧୦ରେ ରକ୍ସଲ ଷ୍ଟେସନରୁ ଯାତ୍ରାରମ୍ଭ କରିଥିଲା। ସମ୍ଭବତଃ କୌଣସି ଯାତ୍ରୀ ଟ୍ରେନରୁ ଓହ୍ଲାଇବା ସମୟରେ ପୋଷା କୁକୁରକୁ ସାଙ୍ଗରେ ନେବାକୁ ଭୁଲି ଯାଇଥିବା ଅନୁମାନ କରାଯାଉଛି।
