ସମାଜ ଡିଜିଟାଲ ଡେସ୍କ: ଟ୍ରକ ଧକ୍କାରେ ଚାଲିଗଲା ବାପା ଓ ଝିଅର ଜୀବନ। ମା’ ଗୁରୁତର ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଘଟଣାଟି ଘଟିଛି କେନ୍ଦୁଝର ଜିଲା ଦେଇ ଯାଇଥିବା ୫୨୦ ନମ୍ବର ଜାତୀୟ ରାଜପଥର ଟୋପାଡିହି ଛକରେ। ମୃତକ ହେଲେ ରୁଗୁଡ଼ି ତାନା ଲୋଡ଼ାପଦା ଅଞ୍ଚଳର ଦିଲୀପ ସି ଏବଂ ତାଙ୍କ ଦୁଇ ବର୍ଷର ଶିଶୁକନ୍ୟା। ଆହତ ଦିଲୀପଙ୍କ ସ୍ତ୍ରୀ ତୁଳସୀ ସି ବଡ଼ବିଲ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ସୂଚନା ଅନୁସାରେ, ଦିଲୀପ ତାଙ୍କ ସ୍ତ୍ରୀ ଓ ଝିଅ ସହିତ ବାଇକରେ ଯାଉଥିବା ସମୟରେ ଟୋପାଡିହି ଛକଠାରେ ଏକ ଟ୍ରକ ସେମାନଙ୍କୁ ଧକ୍କା ଦେଇଥିଲା। ଖବର ପାଇ ପୁଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ସମସ୍ତଙ୍କୁ ଡାକ୍ତରଖାନା ନେଇଥିଲା। ହେଲେ ସେଠାରେ ଦିଲୀପ ଏବଂ ତାଙ୍କ ଝିଅକୁ ଡାକ୍ତର ମୃତ ଘୋଷଣା କରିଥିଲେ। ଦୁର୍ଘଟଣା ପରେ ଟ୍ରକ ସହିତ ଡ୍ରାଇଭର ଫେରାର ହୋଇଯାଇଥିବା ସୂଚନା ମିଳିଛି।
