ଡେସ୍କ: ଥାଇଲାଣ୍ଡ-କମ୍ବୋଡିଆ ସୀମାନ୍ତ ଅଞ୍ଚଳର ଅନେକ ସ୍ଥାନରେ ସଂଘର୍ଷ ଜାରି ରହିଥିବା ସୂଚନା ମିଳିଛି। କାମ୍ବୋଡିଆ ସୈନ୍ୟମାନେ ଭାରୀ ଅସ୍ତ୍ରଶସ୍ତ୍ର ଏବଂ ବିଏମ-୨୧ ରକେଟ୍ ସିଷ୍ଟମ ବ୍ୟବହାର କରି ନିରନ୍ତର ବୋମାମାଡ଼ ଚଳାଇଛନ୍ତି। ରଣନୈତିକ ପରିସ୍ଥିତି ଅନୁସାରେ ଥାଇ ସୈନ୍ୟମାନେ ଦେଉଛନ୍ତି।
ଥାଇଲାଣ୍ଡ ଜନସ୍ୱାସ୍ଥ୍ୟ ମନ୍ତ୍ରଣାଳୟର ଉପ ମୁଖପାତ୍ରଙ୍କ ଅନୁଯାୟୀ, ଗତକାଲି ରାତିରେ ଥାଇଲାଣ୍ଡ-କମ୍ବୋଡିଆ ସୀମା ନିକଟରେ ସାମରିକ ସଂଘର୍ଷରେ ୧୪ ଜଣ ଥାଇଲାଣ୍ଡ ଲୋକଙ୍କ ମୃତ୍ୟୁ ହୋଇଥିବା ବେଳେ ୪୬ ଜଣ ଆହତ ହୋଇଛନ୍ତି। କାମ୍ବୋଡିଆର ଓଡାର ମିଞ୍ଚେ ଡେପୁଟି ଗଭର୍ଣ୍ଣର, ମେଟ୍ ମିୟାସ୍ ଫେକଡେ କହିଛନ୍ତି ଯେ ଗତକାଲି ଥାଇଲାଣ୍ଡ ପକ୍ଷରୁ କାମ୍ବୋଡିଆ ଅଞ୍ଚଳରେ ତୋପ ଗୁଳି ମାଡ଼ କରାଯିବାରୁ ଜଣେ ଗ୍ରାମବାସୀଙ୍କ ମୃତ୍ୟୁ ହୋଇଥିଲା ଏବଂ ଅନ୍ୟ ପାଞ୍ଚ ଜଣ ଆହତ ହୋଇଥିଲେ। ସେ କହିଛନ୍ତି, ସୀମା ନିକଟରେ ରହୁଥିବା ୨ ହଜାର ୯୦୦ରୁ ଅଧିକ ପରିବାରକୁ ସୁରକ୍ଷିତ ଆଶ୍ରୟସ୍ଥଳକୁ ସ୍ଥାନାନ୍ତର କରାଯାଇଛି। କାମ୍ବୋଡିଆର ପ୍ରତିରକ୍ଷା ମନ୍ତ୍ରଣାଳୟର ଉପ ସଚିବ ଏବଂ ମୁଖପାତ୍ର ଲେଫ୍ଟନାଣ୍ଟ ଜେନେରାଲ ମାଲି ସୋଚେତା ଶୁକ୍ରବାର ସକାଳେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଥାଇ ସୈନ୍ୟମାନେ କାମ୍ବୋଡିଆର ଓଡାର ମିଞ୍ଚେ ଏବଂ ପ୍ରିଆହ ଭିହାର୍ ପ୍ରଦେଶର ଅନେକ ସ୍ଥାନରେ ଆକ୍ରମଣ କରିବା ପାଇଁ ଭାରୀ ଅସ୍ତ୍ରଶସ୍ତ୍ର ଏବଂ ଏଫ-୧୬ ଲଢ଼ୁଆ ବିମାନ ସହିତ କ୍ଲଷ୍ଟର ବୋମା ବ୍ୟବହାର କରିଛନ୍ତି। ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ୍ ଉଭୟ ପକ୍ଷକୁ ସର୍ବାଧିକ ସଂଯମତା ଅବଲମ୍ବନ କରିବାକୁ ଏବଂ ଆଲୋଚନା ମାଧ୍ୟମରେ ଯେକୌଣସି ସମସ୍ୟାର ସମାଧାନ କରିବାକୁ ଅନୁରୋଧ କରିଛନ୍ତି।
