ଢାକା: ବାଂଲାଦେଶ ବାୟୁସେନାର ଏକ ଏଫ୍-୭ ଯୁଦ୍ଧବିମାନ ସୋମବାର ଦୁର୍ଘଟଣାଗ୍ରସ୍ତ ହୋଇ ରାଜଧାନୀ ଢାକା ନିକଟସ୍ଥ କଲେଜ ପରିସରରେ ଖସିପଡିବାରୁ ୨୦ ଜଣ ପ୍ରାଣ ହରାଇଛନ୍ତି। ୧୭୦ରୁ ଅଧିକ ଆହତ ହୋଇଥିବାବେଳେ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଚୀନ ନିର୍ମିତ ଏହି ବିମାନଟି ଢାକା ଉପକଣ୍ଠରେ ଅବସ୍ଥିତ ମାଇଲଷ୍ଟୋନ ସ୍କୁଲ ଓ କଲେଜ ପରିସରରେ ଖସିପଡିଥିଲା। ମୃତକଙ୍କ ମଧ୍ୟରେ ୧୬ ଛାତ୍ର, ଦୁଇ ଅଧ୍ୟାପକ ଏବଂ ବିମାନର ପାଇଲଟ ସାମିଲ ଅଛନ୍ତି। ବିମାନଟି ଅପରାହ୍ଣ ୧ଟା ସମୟରେ ଉଡାଣ ଆରମ୍ଭ କରିଥିଲା। ତେବେ ଯାନ୍ତ୍ରିକ ତ୍ରୁଟି ପରିଲକ୍ଷିତ ହେବାପରେ ବିମାନଟି ଉକ୍ତ କଲେଜ କୋଠାରେ ପିଟି ହୋଇଥିଲା। ସେହି ସମୟରେ ଶ୍ରେଣୀଗୃହରେ ପାଠପଢା ଚାଲିଥିବାବେେଳ ଅଧ୍ୟାପକ ଓ ଛାତ୍ରଛାତ୍ରୀ ଉପସ୍ଥିତ ଥିଲେ। ଦୁର୍ଘଟଣା ପରେ ବିମାନରେ ନିଆଁ ଲାଗିଯାଇଥିଲା। ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ବାଂଲାଦେଶ ଅନ୍ତରୀଣ ସରକାରର ମୁଖ୍ୟ ମହମ୍ମଦ ୟୁନୁସ ଏହି ଘଟଣାରେ ଗଭୀର ଦୁଃଖପ୍ରକାଶ କରିବା ସହ ଉଦ୍ଧାର କାର୍ଯ୍ୟ ତ୍ବରାନ୍ବିତ କରିବାକୁ ନିର୍ଦେଶ ଦେଇଛନ୍ତି। ମାଇଲଷ୍ଟୋନ ସ୍କୁଲ ଓ କଲେଜରେ ନର୍ସରୀରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ ଥିବାବେଳେ ଦୁଇ ହଜାରରୁ ଅଧିକ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି।
Popular Categories
Previous article
Next article