ନୂଆଦିଲ୍ଲୀ: ଗୁରୁ ରବିଦାସଙ୍କ ଓ ଛତ୍ରପତି ଶିବାଜୀ ମହାରାଜାଙ୍କ ଜୟନ୍ତୀ ପାଳିତ ହୋଇଯାଇଛି। ଚତୁର୍ଦ୍ଦଶ ଶତାବ୍ଦୀର ସନ୍ଥ ଗୁରୁ ରବିଦାସ ଉତ୍ତର ଭାରତରେ ଭକ୍ତି ଆନ୍ଦୋଳନର ପ୍ରଚାର ଓ ପ୍ରସାର କରିବା ସଙ୍ଗେ ସଙ୍ଗେ ବହୁ ସଂସ୍କାରମୂଳକ ପଦକ୍ଷେପ ନେଇଥିଲେ। ଏହି ଅବସରରେ ଶ୍ରୀ ଗୁରୁ ରବିଦାସଙ୍କ ଶିଷ୍ୟମାନେ ବାରାଣାସୀର ସେର୍ ଗୋବର୍ଦ୍ଧନପୁରଠାରେ ଜନ୍ମ ଆସ୍ଥାନ ମନ୍ଦିରରେ ଏକତ୍ରିତ ହୋଇଛନ୍ତି। ରାଷ୍ଟ୍ରପତି ରାମନାଥ କୋବିନ୍ଦ ଦେଶବାସୀଙ୍କୁ ଏହି ଅବସରରେ ଶୁଭେଚ୍ଛା ଜଣାଇଛନ୍ତି। ଏକ ବାର୍ତ୍ତାରେ ଶ୍ରୀ କୋବିନ୍ଦ କହିଛନ୍ତି ଯେ ଭକ୍ତି ଆନ୍ଦୋଳନ ମାଧ୍ୟମରେ ସମାଜରେ ଶାନ୍ତି, ସଦ୍ଭାବନା ଓ ଭାତୃତ୍ୱଭାବ ସୃଷ୍ଟି କରିବା ଦିଗରେ ସେ ପ୍ରମୁଖ ଭୂମିକା ଗ୍ରହଣ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ବାର୍ତ୍ତାରେ କହିଛନ୍ତି ସଦ୍ଭାବନା, ସମାନତା ଓ ସାମାଜିକ ସଶକ୍ତିକରଣ ପାଇଁ ସନ୍ଥ ରବି ଦାସଙ୍କର ଅମର ବାଣୀ ଅତି ମୂଲ୍ୟବାନ ଥିଲା। ଶ୍ରୀ ମୋଦି ଛତ୍ରପତି ଶିବାଜୀ ମହାରାଜାଙ୍କ ଜୟନ୍ତୀ ଉପଲକ୍ଷେ ତାଙ୍କପ୍ରତି ଶ୍ରଦ୍ଧାଞ୍ଜଳି ଜଣାଇଛନ୍ତି। ସେ କହିଛନ୍ତି ସତ୍ୟ ଓ ନ୍ୟାୟର ପୂଜାରୀ ଛତ୍ରପତି ଶିବାଜୀ ମହାରାଜ ଜଣେ ଆଦର୍ଶ ଶାସକ, ନିଷ୍ଠାବାନ ଦେଶଭକ୍ତ ଥିଲେ ଏବଂ ଗରୀବ ଓ ଅବହେଳିତଙ୍କ ପାଇଁ ସାରାଜୀବନ ଉତ୍ସର୍ଗ କରିଥିଲେ।
