ହରଭଙ୍ଗା : ଯାଜପୁର ଜିଲ୍ଲାରୁ ଆରମ୍ଭ ହୋଇଥିବା ଝାଡାବାନ୍ତି ସମ୍ପ୍ରତି ରାଜ୍ୟର ସାତଗୋଟି ଜିଲ୍ଲାକୁ ବ୍ୟାପିଲାଣି । ଯାଜପୁର ପରେ କେନ୍ଦୁଝର,ଭଦ୍ରକ,କଟକ,ପୁରୀ,ଢେଙ୍କାନାଳ ଓ କେନ୍ଦ୍ରାପଡା ଜିଲ୍ଲାକୁ ଝାଡାବାନ୍ତି ବ୍ୟାପିଲାଣି ।ଅନ୍ୟପଟେ ଆଉ ୩ଦିନ ପରେ ରାଜ୍ୟରେ ସମସ୍ତ ସ୍କୁଲଗୁଡିକ ଖୋଲିବ ।ସ୍କୁଲ ଖୋଲିବା ପୂର୍ବରୁ ବିଭିନ୍ନ ଜିଲ୍ଲାରେ ବ୍ୟାପୁଥିବା ଝାଡାବାନ୍ତି ଏବେ ସାଧାରଣ ଲୋକଙ୍କ ମନରେ ଭୟ ଘାରିଲାଣି ।ଏହାକୁ ଦୃଷ୍ଟିରେ ରଖି ରାଜ୍ୟସରକାରଙ୍କ ପକ୍ଷରୁ ସମସ୍ତ ଜିଲ୍ଲାର ଜିଲ୍ଲାପାଳଙ୍କୁ ସର୍ତକ ରହିବାକୁ ପରାମର୍ଶ ଦିଆଯାଇଛି । ରାଜ୍ୟସରକାରଙ୍କ ନିର୍ଦ୍ଦେଶ ପରେ ବୌଦ୍ଧଜିଲ୍ଲାରେ ମଧ୍ୟ ସର୍ତକତା ଅବଲମ୍ବନ ପାଇଁ ଏବେ ସ୍ୱଛତା,ଶୁଦ୍ଧ ପାନୀୟଜଳ ବ୍ୟବହାର ସାଙ୍ଗକୁ ନିରାପତାକୁ ଗୁରୁତ୍ୱ ଦିଆ୍ଯାଉଛି । ବିଶେଷକରି ଖାଦ୍ୟ ସୁରକ୍ଷା ଏବଂ ନିରାପତ୍ତା ବିଭାଗ ପକ୍ଷରୁ ଗୁପଚୁପ ଦୋକାନୀ ଏବଂ ହୋଟେଲ,ରେଷ୍ଟୁରାଂଟ ଗୁଡିକ ଉପରେ କଡା ନଜର ରଖାଯାଉଛି । ପ୍ରାଥମିକତା ସୁରକ୍ଷା ଦୃଷ୍ଟିରୁ ସିଲ ପାଣି ବୋତଲ ,ଶୁଦ୍ଧ ପାନୀୟ ଜଳ ବ୍ୟବହାର ପାଇଁ ହୋଟେଲ ,ରେଷ୍ଟୁରାଂଟ ମାନଙ୍କୁ କଡାନିର୍ଦ୍ଦେଶ ଦିଆଯାଇଛି ।
ଏହା ସହିତ ଗୁପଚୁପ୍ ଦୋକାନୀ ମାନଙ୍କୁ ଗୁପଚୁପ୍ ପାଇଁ ବ୍ୟବହାର ହେଉଥିବା ଖଟାପାଣିକୁ ବିଶୁଦ୍ଧ ପାଣିକୁ ଫୁଟାଇ ବ୍ୟବହାର ପାଇଁ ନର୍ଦ୍ଦେଶ ଦିଆଯାଇଛି । ଏପରିକି ଫାଷ୍ଟଫୁଡ ,ଭଳି ଚାଟ,ଅନ୍ୟାନ୍ୟ ଦୋକାନଗୁଡିକ ଉପରେ ମଧ୍ୟ କଡା ନଜର ରଖାଯାଇଛି ।ବିଶେଷକରି ଜିଲ୍ଲାରେ ଥିବା ତିନୋଟି ବେସରକାରୀ ପାନୀୟଜଳ ପ୍ରସ୍ତୁତ ୟୁନିଟି ଉପରେ ମଧ୍ୟ କଡା ନଜର ରଖାଯାଇଛି । ଏ ସର୍ମ୍ପକରେ ବୌଦ୍ଧ ସି.ଡି.ଏମ.ଓ ଡା .ମଦନମୋହନ ପ୍ରଧାନଙ୍କୁ ପଚାରିବାରୁ ସ୍ୱଛତା ସହିତ ବିଭିନ୍ନ ଓ୍ବାଟର ପଏଣ୍ଟଗୁଡିକୁ ବିଶୁଦ୍ଧ ପାଇଁ ଜଳ ଓ ପରିମଳ ବିଭାଗ ସହିତ ଆମ ସ୍ୱାସ୍ଥ୍ୟ ବିଭାଗ ପକ୍ଷରୁ ପଦକ୍ଷେପ ଆରମ୍ଭ ହୋଇଯାଇଥିବା ସେ ସୂଚନା ଦେଇଛନ୍ତି । ଏଥିପାଇଁ ବିଭାଗ ପକ୍ଷରୁ ତୀକ୍ଷ୍ନ ଦୃଷ୍ଟି ଦିଆଯାଉଥିବା ସେ କହିଛନ୍ତି । ଏ ସର୍ମ୍ପକରେ ହରଭଙ୍ଗା ଜଳ ଓ ପରିମଳ ବିଭାଗ ଯନ୍ତ୍ରୀ ଜୀବନ ପଟ୍ଟନାୟକଙ୍କୁ ପଚାରିବାରୁ ଖୋଲାକୂଅ ଠାରୁ ଆରମ୍ଭକରି ସମସ୍ତ ନଳକୂପ ଏବଂ ବୋରେଓଲ ଗୁଡିକୁ ବ୍ଲିଂଚିଂ ଦ୍ୱାରା ବିଶୁଦ୍ଧିକରଣ ଆରମ୍ଭ ହୋଇଥିବାନେଇ ସେ ସୂଚନା ଦେଇଛନ୍ତି ।
