ସମାଜ ଡିଜିଟାଲ ଡେସ୍କ: ଇସ୍ରାଏଲ-ଇରାନ ଯୁଦ୍ଧକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବଡ଼ ମନ୍ତବ୍ୟ ଦେଇଛନ୍ତି। ଯାହାକୁ ନେଇ ଏବେ ନାନା ଚର୍ଚ୍ଚା ଆରମ୍ଭ ହୋଇଛି। ବିଳମ୍ବ ହେବା ଆଗରୁ ଇରାନ ଇସ୍ରାଏଲ ସହିତ ବୁଝାମଣା କରୁ ବୋଲି ଟ୍ରମ୍ପ ମନ୍ତବ୍ୟ ଦେଇଛନ୍ତି। ଟ୍ରମ୍ପ ଖୋଲାଖୋଲି ଭାବେ କହିଛନ୍ତି ଯେ, ଏହି ଯୁଦ୍ଧକୁ ଇରାନ ଜିତି ପାରିବ ନାହିଁ। ତାଙ୍କର ଏହି ମନ୍ତବ୍ୟ କିଛି ଭିନ୍ନ ଇଙ୍ଗିତ କରୁଛି। ଅର୍ଥାତ ଦରକାର ପଡ଼ିଲେ ଆମେରିକା ଇସ୍ରାଏଲକୁ ପ୍ରତ୍ୟକ୍ଷ ସହଯୋଗ କରିପାରେ ବୋଲି ଟ୍ରମ୍ପଙ୍କ ମନ୍ତବ୍ୟରୁ ବୁଝାପଡ଼ୁଛି।
ଟ୍ରମ୍ପ ସୋମବାର କାନାଡ଼ାରେ ଅନୁଷ୍ଠିତ ଜି-୭ ବୈଠକରେ ସାମ୍ବାଦିକମାନଙ୍କ ପ୍ରଶ୍ନର ଉତ୍ତର ଦେଇ କହିଛନ୍ତି, ଇସ୍ରାଏଲ ସହିତ ଚାଲିଥିବା ଯୁଦ୍ଧରେ ଇରାନ ଜିତୁନାହିଁ। ସମୟ ବିଳମ୍ବ ହେବା ଆଗରୁ ସେ ତୁରନ୍ତ ଆଲୋଚନା କରିବା ଉଚିତ। ଇରାନକୁ ଡିଲ୍ କରିବାକୁ ପଡ଼ିବ। ଏହା ଦୁଇପକ୍ଷଙ୍କ ପାଇଁ କଷ୍ଟକର ହୋଇପାରେ। କିନ୍ତୁ ଇରାନ ଯୁଦ୍ଧରେ ବିଜୟୀ ହେବ ନାହିଁ।
