ଫୁଲବାଣୀ: ପୁତୁଡି ଜଳପ୍ରପାତରେ ବାହାର ରାଜ୍ୟରୁ ଆସିଥିବା କିଛି ପର୍ଯ୍ୟଟକଙ୍କୁ ଆକ୍ରମଣ କରାଯାଇଛି। ଏହି ଘଟଣାରେ ଦୁର୍ବୃତ୍ତମାନଙ୍କୁ ଖୋଜିବା ଜାରି ରହିଥିବାବେଳେ କେହି ମଧ୍ୟ ପୁଲିସ ହାତରେ ଧରା ପଡିନାହାନ୍ତି।
ସୂଚନାଯୋଗ୍ୟ, କେରଳ ରାଜ୍ୟ କନ୍ନୁର ଜିଲ୍ଲାର କିଛି ବ୍ୟକ୍ତି ଫୁଲବାଣୀ ସରକାରୀ ମେଡିକାଲ କଲେଜ ସୋଲାର ପ୍ରକଳ୍ପ ପାଇଁ ସର୍ଭେ କାର୍ଯ୍ୟରେ ନିୟୋଜିତ ଅଛନ୍ତି। ସାଇଟ ଇଞ୍ଜିନିୟର ଆନନ୍ଦ କିରଣଙ୍କ ନେତୃତ୍ୱରେ ସେମାନେ ରବିବାର ୪ଟି ସ୍କୁଟିରେ ପୁତୁଡି ଜଳପ୍ରପାତ ବୁଲିବା ପାଇଁ ଯାଇଥିଲେ। ସେଠାରେ କିଛି ସ୍ଥାନୀୟ ଯୁବକଙ୍କ ସହିତ ସେମାନଙ୍କର କୌଣସି କାରଣରୁ ଯୁକ୍ତିତର୍କ ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ଯୁବକମାନେ ସେମାନଙ୍କୁ ମରଣାନ୍ତକ ଆକ୍ରମଣ କରିବା ସହ ସେମାନଙ୍କଠାରୁ ୭ଟି ମୋବାଇଲ ଫୋନ ଓ ଅନ୍ୟାନ୍ୟ ଜିନିଷ ଛଡାଇ ନେଇଥିଲେ।
ଜଳପ୍ରପାତ ବୁଲିବାକୁ ଯାଇଥିବା ଅନ୍ୟ କିଛି ଯୁବକ ଆସି ଏ ନେଇ ଫୁଲବାଣୀ ଟାଉନ ଥାନାରେ ଖବର ଦେଇଥିଲେ। ଟାଉନ ଥାନା ପୁଲିସ ସଦର ଥାନାକୁ ସୂଚନା ଦେବା ପରେ ସଦର ପୁଲିସ ଯାଇ ସେମାନଙ୍କୁ ଉଦ୍ଧାର କରିଥିଲା। ତେବେ ସେତେବେଳକୁ ଆକ୍ରମଣକାରୀମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ସଦର ପୁଲିସ ଏ ସମ୍ପର୍କରେ ୧୪୮/୨୫ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି। ତେବେ ବର୍ତ୍ତମାନ ସୁଦ୍ଧା କୌଣସି ଦୁର୍ବୃତ୍ତ ଧରାପଡି ନ ଥିବା ତଦନ୍ତ ଅଧିକାରୀ ସମ୍ବିତ କୁମାର ବେହେରା ସୂଚନା ଦେଇଛନ୍ତି।
