ଇସଲାମାବାଦ: ପାକିସ୍ତାନସ୍ଥିତ ଭାରତୀୟ ଦୂତାବାସର ଜଣେ ଅଧିକାରୀଙ୍କୁ ବହିଷ୍କାର କରିବାକୁ ଗୁରୁବାର ଘୋଷଣା କରିଛନ୍ତି ପାକ୍ ସରକାର। ଭାରତର କାର୍ଯ୍ୟାନୁଷ୍ଠାନର ବିରୋଧରେ ପାକିସ୍ତାନ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ବୁଧବାର ପାକିସ୍ତାନ ଦୂତାବାସର ଜଣେ ଅଧିକାରୀଙ୍କୁ ଅନୁପଯୁକ୍ତ ଘୋଷଣା କରି ବହିଷ୍କାର କରିଥିଲା ଭାରତ। ପାକିସ୍ତାନୀ ଦୂତାବାସର ଅଧିକାରୀଙ୍କୁ ୨୪ ଘଣ୍ଟା ମଧ୍ୟରେ ଦେଶ ଛାଡ଼ିବାକୁ ଭାରତ ନିର୍ଦ୍ଦେଶ ଦେଇଥିଲା। ଭାରତର କାର୍ଯ୍ୟାନୁଷ୍ଠାନରେ ଚିହିଁକି ଉଠିଥିବା ପାକିସ୍ତାନ ଏବେ କୌଣସି ଠୋସ୍ ପ୍ରମାଣ ବିନା ଭାରତୀୟ ଦୂତାବାସର ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ପୂର୍ବରୁ ମେ’ ୧୩ ତାରିଖରେ ମଧ୍ୟ ପାକିସ୍ତାନୀ ଦୂତାବାଦର ଜଣେ ଅଧିକାରୀଙ୍କୁ ଅନୁପଯୁକ୍ତ ଘୋଷଣା କରି ବହିଷ୍କାର କରିଥିଲା ଭାରତ। ଏହି ଅଧିକାରୀମାନଙ୍କ ବିରୋଧରେ ଗୁପ୍ତଚର ଅଭିଯୋଗ ହୋଇଛି। ନୂଆଦିଲ୍ଲୀସ୍ଥିତ ପାକିସ୍ତାନୀ ଦୂତାବାସର ଜଣେ ଅଧିକାରୀ ଦାନିଶଙ୍କୁ ତ ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ସହ ଜଡ଼ିତ ବୋଲି କୁହାଯାଉଛି। ଗୁପ୍ତଚର ଅଭିଯୋଗରେ ଧରାପଡ଼ିଥିବା ଭାରତୀୟ ୟୁଟ୍ୟୁବର ଜ୍ୟୋତି ମାଲହୋତ୍ରା ଏବଂ ପଞ୍ଜାବ ଓ ହରିୟାଣାରୁ ଗିରଫ ହୋଇଥିବା ଅନେକ ଗୁପ୍ତଚରଙ୍କ ସହ ଦାନିଶଙ୍କ ଲିଙ୍କ୍ ଥିବା ଜଣାପଡ଼ିଛି।
