ସମାଜ ଡିଜିଟାଲ ଡେସ୍କ: ଦକ୍ଷିଣ ଭାରତୀୟ ପାଓ୍ବରଷ୍ଟାର ପବନ କଲ୍ୟାଣଙ୍କ ବହୁପ୍ରତୀକ୍ଷିତ ଚଳଚ୍ଚିତ୍ର ‘ହରି ହର ବୀରା ମଲ୍ଲୁ’ ଭାଗ-୧ର ପ୍ରଥମ ଝଲକ୍ ସାମ୍ନାକୁ ଆସିଛି। ଫିଲ୍ମର ଅଫିସିଆଲ ‘ଏକ୍ସ’ ହ୍ୟାଣ୍ଡେଲରେ ଏହାର ପ୍ରଥମ ଝଲକ୍ ଶେୟାର କରାଯାଇଛି, ଯାହାକୁ ଦେଖିବାପରେ ଚଳଚ୍ଚିତ୍ରକୁ ନେଇ ପ୍ରଶଂସକଙ୍କ ଉତ୍ସାହ ଦୁଇଗୁଣା ବୃଦ୍ଧି ପାଇଛି।
‘ହରି ହର ବୀରା ମଲ୍ଲୁ’ ଏକ ଆକ୍ସନ୍ ଆଡଭେଞ୍ଚର୍ ଫିଲ୍ମ, ଯେଉଁଥିରେ ପବନ କଲ୍ୟାଣ ମୁଖ୍ୟ ଭୂମିକାରେ ଅଭିନୟ କରିଛନ୍ତି। ‘ହରି ହର ବୀରା ମଲ୍ଲୁ’ ଅଫିସିଆଲ୍ ‘ଏକ୍ସ’ ଆକାଉଣ୍ଟରେ ଏକ GIF ଶେୟାର କରାଯାଇଛି, ଯେଉଁଥିରେ ପବନଙ୍କ ପିଠି ଦେଖାଯାଉଛି ଏବଂ ଏକ ବଡ଼ ପକ୍ଷୀ ତାଙ୍କ କାନ୍ଧରେ ଆସି ବସିଛି, ସତେ ଯେମିତି ସେ ଅଭିନେତାଙ୍କ ବନ୍ଧୁ। ତେବେ ଏହି ପକ୍ଷୀଟି ଚିଲ ନା ଛଞ୍ଚାଣ ତାହା ସ୍ପଷ୍ଟ ଭାବେ ଜଣାପଡ଼ୁନାହିଁ, କାରଣ GIFରେ ସାମ୍ନାର ଝଲକ୍ ଦେଖାଯାଉ ନାହିଁ। ଏହି ଛୋଟ GIF ଝଲକ୍ ପାଇ ପବନଙ୍କ ପ୍ରଶଂସକମାନେ ବେଶ୍ ଖୁସି ଓ ଉତ୍ସାହିତ ହୋଇଛନ୍ତି।
⏳⏳⏳
🔥🏹⚔️🦅#HariHaraVeeraMallu pic.twitter.com/eigxAbWqaM
— Hari Hara Veera Mallu (@HHVMFilm) May 15, 2025
‘ହରି ହର ବୀରା ମଲ୍ଲୁ’ର ନିର୍ଦେଶନା ଦେଇଛନ୍ତି କ୍ରିଶ୍ ଜଗରଲାମୁଡି ଓ ଏଏମ ଜ୍ୟୋତି କୃଷ୍ଣା। ଏହି ଚଳଚ୍ଚିତ୍ରରେ ପ୍ରସିଦ୍ଧ ଡାକୁ ବୀରା ମଲ୍ଲୁଙ୍କ ଜୀବନକୁ ଚିତ୍ରଣ କରାଯାଇଛି। ଫିଲ୍ମରେ ପବନ କଲ୍ୟାଣଙ୍କ ବ୍ୟତୀତ ବବି ଦେଓଲ, ନିଧି ଅଗ୍ରଓ୍ବାଲ, ନରଗିସ୍ ଫାଖରୀ ଓ ନୋରା ଫତେହୀ ପ୍ରମୁଖ କଳାକାର ଗୁରୁତ୍ଵପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ମେ’ ୩୦ ତାରିଖରେ ତେଲୁଗୁ, ହିନ୍ଦୀ, ତାମିଲ, କନ୍ନଡ଼ ଓ ମାଲାୟାଲମ୍ ଭାଷାରେ ମୁକ୍ତିଲାଭ କରିବ ଏହି ଚଳଚ୍ଚିତ୍ର।
