ପାଟଣା :ପାଟଣା ବନାଞ୍ଚଳ ଅନ୍ତର୍ଗତ କେନ୍ଦେଇପଶି ନିକଟରେ ଗତ ରାତିରୁ ଏକ ଗୋଠଛଡା ଦନ୍ତା ରହିଥିବାବେଳେ ଆଜି ଏହାକୁ ଦେଖିବାକୁ ଏବଂ ଘଉଡ଼ାଇବା ପାଇଁ ବହୁ ଲୋକ ଏଠାରେ ପହଞ୍ଚିଥିଲେ। ଦନ୍ତା ଟିକୁ ଘଉଡ଼ାଇବା ସମୟରେ ସେଠାରେ ଥିବା ମୁରୁସୁଆଁ ପଞ୍ଚାୟତ ଭାଲୁପାହାଡି ଗ୍ରାମର ଗଣେଶ୍ଵର ମହାନ୍ତ (୬୫) ଦନ୍ତା ହାବୁଡ଼ରେ ପଡ଼ିଯାଇଥିଲେ। ଦନ୍ତାହାତୀଟି ଗଣେଶ୍ଵର ମହାନ୍ତଙ୍କୁ ଶୁଣ୍ଡରେ ଟେକି ଫୋପାଡି ଦେବାରୁ ସେ ଗୁରୁତର ହୋଇଯାଇଥିଲେ।
ସ୍ଥାନୀୟ ଲୋକେ ଓ ବନରକ୍ଷୀ ତପସ୍ୱୀନୀ ନାଏକଙ୍କ ସହ ଅନ୍ୟ କର୍ମଚାରୀମାନେ ତାଙ୍କୁ ଘଟଣାସ୍ଥଳରୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ମଧ୍ୟ ଡାକ୍ତର ସେଠାରେ ତାଙ୍କୁୁ ମୃତ ଘୋଷଣା କରିଥିଲେ ।ଏନେଇ ତୁରୁମୁଙ୍ଗା ଥାନାରେ ଅପମୃତ୍ୟୁ ମାମଲା ୧୫/୨୦୨୫ ମୂଳେ ଆଜି ପୁଲିସ ମୃତକର ଶବ ବ୍ୟବଚ୍ଛେଦ କରାଇ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି।
