ନୂଆଦିଲ୍ଲୀ: ଫୌଜଦାରୀ ମାମଲାରେ ଦୋଷୀ ସାଂସଦ, ବିଧାୟକ ଓ ଅନ୍ୟ ରାଜନେତାଙ୍କୁ ଆଜୀବନ ବାସନ୍ଦ କରିବା ଲାଗି ଦାବି ହୋଇଥିବା ଏକ ଆବେଦନ ଉପରେ ସୁପ୍ରିମକୋର୍ଟ ସୋମବାର ଶୁଣାଣି କରିଛନ୍ତି। ଆବେଦନର ଶୁଣାଣି କରି ସୁପ୍ରିମକୋର୍ଟ ବିଚାରପତି ଦୀପଙ୍କର ଦତ୍ତ ଓ ମନମୋହନଙ୍କୁ ନେଇ ଗଠିତ ପୀଠ କେନ୍ଦ୍ର ସରକାର ଓ ଭାରତର ନିର୍ବାଚନ ଆୟୋଗ (ଇସିଆଇ)ଙ୍କ ଠାରୁ ଜବାବ ଲୋଡିଛନ୍ତି। ଜନପ୍ରତିନିଧି ଆଇନର ୧୯୫୧ର ଧାରା ୮ ଅନୁଯାୟୀ ଫୌଜଦାରୀ ମାମଲାରେ ଦୋଷୀ ସାବ୍ୟସ୍ତ ହେଉଥିବା ରାଜନେତାଙ୍କୁ ୬ବର୍ଷ ପାଇଁ ନିର୍ବାଚନ ଲଢିବାରୁ ବାସନ୍ଦ କରାଯିବ। ଜନ ପ୍ରତିନିଧି ଆଇନର ଧାରା ୯ ଅନୁଯାୟୀ ଯେଉଁ ସରକାରୀ କର୍ମଚାରୀ ଦୁର୍ନୀତି ଓ ସରକାରଙ୍କ ପ୍ରତି ଆନୁଗତ୍ୟ ପ୍ରଦର୍ଶନରେ ଅବହେଳା ପାଇଁ ବହିଷ୍କୃତ ହୋଇଥିବେ ସେମାନେ ୫ବର୍ଷ ପାଇଁ ନିର୍ବାଚନ ଲଢିପାରିବେ ନାହିଁ।
ତେବେ ଏହି ଦୁଇ ଧାରାର ସାମ୍ବିଧାନିକ ବୈଧତା ପ୍ରତି ପ୍ରଶ୍ନ ଉଠାଇବା ପୂର୍ବକ ଦୋଷୀ ରାଜନେତାଙ୍କୁ ଆଜୀବନ ବାସନ୍ଦ କରିବା ଲାଗି ଦାବି କରାଯାଇଛି। ଏ ନେଇ ଓକିଲ ଉମେଶ ଉପାଧ୍ୟାୟଙ୍କ ପକ୍ଷରୁ ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାୟର କରାଯାଇଛି। ଏହା ସହିତ ସାଂସଦ ଓ ବିଧାୟକଙ୍କ ବିରୋଧରେ ଆସୁଥିବା ଫୌଜଦାରୀ ମାମଲାଗୁଡିକୁ ଗୋଟିଏ ବର୍ଷ ମଧ୍ୟରେ ଶୁଣାଣି କରିବା ଲାଗି ଏକ ସମୟ ସୀମା ଧାର୍ଯ୍ୟ କରିବା ଲାଗି ପିଆଇଏଲ୍ରେ ଦାବି କରାଯାଇଛି।
ଏହି ମାମଲାରେ ବରିଷ୍ଠ ଓକିଲ ବିଜୟ ହଂସାରିଆ କୋର୍ଟ ମିତ୍ର ଭାବେ ନିଯୁକ୍ତ ହୋଇଛନ୍ତି। ହଂସାରିଆ କହିଛନ୍ତି ଯେ ସାଂସଦ ଓ ବିଧାୟକଙ୍କ ବିରୋଧରେ ରହିଥିବା ଫୌଜଦାରୀ ମାମଲାର ଶୁଣାଣି କରିବାରେ ସ୍ବତନ୍ତ୍ର ଅଦାଲତଗୁଡିକ ଅନେକ ପ୍ରତିବନ୍ଧକର ସମ୍ମୁଖୀନ ହେଉଥିବା କହିଥିଲେ। ଅନ୍ୟତମ ବରିଷ୍ଠ ଓକିଲ ବିକାଶ ସିଂହ କହିଥିଲେ ଯେ ଦୋଷୀ ରାଜନେତାଙ୍କ ରାଜନୀତିରେ ପୁନଃ ପ୍ରବେଶକୁ ବାରଣ କରାଯିବା ଦରକାର। ଏଥିପାଇଁ ଆଇନରେ ସଂଶୋଧନ ହେବା ଆବଶ୍ୟକ।
