ନୂଆଦିଲ୍ଲୀ: ତାମିଲନାଡୁ ରାଜ୍ୟପାଳ ଆର.ଏନ.ରବିଙ୍କୁ ଏହି ପଦରୁ ହଟାଇବାକୁ ଆଗତ ଏକ ପିଟିସନ ସୁପ୍ରିମକୋର୍ଟରେ ଖାରଜ ହୋଇଯାଇଛି। ପ୍ରଧାନ ବିଚାରପତି ଜଷ୍ଟିସ ସଞ୍ଜୀବ ଖାନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠରେ ସୋମବାର ଏହାର ଶୁଣାଣି କରାଯାଇଛି। ତେବେ ରାଜ୍ୟପାଳଙ୍କ ଭଳି ସାମ୍ବିଧାନିକ ପଦରେ କାର୍ୟ୍ୟ କରୁଥିବା କୌଣସି ବ୍ୟକ୍ତିଙ୍କୁ ହଟାଇବାର କ୍ଷମତା ସୁପ୍ରିମକୋର୍ଟଙ୍କର ନାହିଁ ବୋଲି ଖଣ୍ଡପୀଠ ରାଏ ଦେବା ସହିତ ପିଟିସନକୁ ଖାରଜ କରିଦେଇଛନ୍ତି। ସାମ୍ବିଧାନିକ ବ୍ୟବସ୍ଥା ଅନୁଯାୟୀ ରାଜ୍ୟପାଳଙ୍କୁ ହଟାଇବାର କ୍ଷମତା କେବଳ ରାଷ୍ଟ୍ରପତିଙ୍କ ନିକଟରେ ସଂରକ୍ଷିତ ରହିଛି ବୋଲି ଖଣ୍ଡପୀଠ ସ୍ପଷ୍ଟ କରିଛନ୍ତି। ଜୟା ସୁକିନ ନାମ୍ନୀ ଜଣେ ଆଇନଜୀବୀ ସୁପ୍ରିମକୋର୍ଟରେ ଏହି ପିଟିସନ ଦାଏର କରିଥିଲେ। ସୂଚନାଯୋଗ୍ୟ ତାମିଲନାଡୁରେ କ୍ଷମତାସୀନ ଏମ.କେ.ଷ୍ଟାଲିନଙ୍କ ସରକାର ଏବଂ ରାଜ୍ୟପାଳ ରବିଙ୍କ ମଧ୍ୟରେ ଦୀର୍ଘ ଦିନ ଧରି ବିବାଦ ଚାଲି ଆସୁଛି। ନିକଟରେ ତାମିଲନାଡୁ ବିଧାନସଭାର ଅଧିବେଶନ ଆରମ୍ଭ ହୋଇଥିବାବେଳେ ଜାତୀୟ ସଙ୍ଗୀତ ଗାନ କରାଯାଇନଥିଲା। ଏହାର ପ୍ରତିବାଦରେ ରାଜ୍ୟପାଳ ଅଭିଭାଷଣ ନ ଦେଇ କକ୍ଷତ୍ୟାଗ କରିଥିଲେ। ଏହାକୁ ନେଇ ଷ୍ଟାଲିନ ଓ ରବିଙ୍କ ମଧ୍ୟରେ ସାନି ବିବାଦ ଉପୁଜିଥିଲା। କେନ୍ଦ୍ର ସରକାରଙ୍କ ନିର୍ଦେଶରେ ରାଜ୍ୟପାଳ କାର୍ୟ୍ୟ କରୁଛନ୍ତି ବୋଲି ଷ୍ଟାଲିନ ଅଭିଯୋଗ କରିଆସୁଛନ୍ତି।
Popular Categories
Previous article
Next article