ଷ୍ଟଡିଟୁରରେ ଆସିଥିଲେ ଛାତ୍ର, ସମୁଦ୍ରରେ ବୁଡ଼ି ପ୍ରାଣ ହରାଇଲେ

ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ଧବଳେଶ୍ଵର ସମୁଦ୍ର କୂଳରେ ଗାଧୋଉଥିବା ବେଳେ ଜଣେ ଛାତ୍ର ବୁଡ଼ିଯାଇ ପ୍ରାଣ ହରାଇଛନ୍ତି। ମୃତକ ହେଲେ ଖୋର୍ଦ୍ଧା ପ୍ରାଣନାଥ ମହାବିଦ୍ୟାଳୟ ଇଲୋକ୍‌ଟ୍ରୋନିକ୍ସ ବିଭାଗର ଯୁକ୍ତ ୩ ଶେଷ ବର୍ଷ ଛାତ୍ର ସୋମନାଥ ପରିଡ଼ା(୨୦)। ବିଭାଗର ଅଧ୍ୟାପକ ଏବଂ ୫୦ ଜଣ ଛାତ୍ରଛାତ୍ରୀ ଷ୍ଟଡିଟୁର୍ ନିମନ୍ତେ ବ୍ରହ୍ମପୁର ଆସି ଆଜି ଅପରାହ୍ନରେ ଗୋଳାବନ୍ଧ ସନ୍ନିକଟ ଧବଳେଶ୍ଵର ବେଳାଭୂମି ବୁଲିବାକୁ ଆସିଥିଲେ। ଅପରାହ୍ନ ପ୍ରାୟ ୧ଟା ସମୟରେ ସେଠାରେ ଥିବା ଶିବ ମନ୍ଦିର ଦର୍ଶନ ନିମନ୍ତେ ସମସ୍ତ  ବିଦ୍ୟାର୍ଥୀ ଅଧ୍ୟାପକ ଯାଇଥିବା ବେଳେ ୪/୫ ଜଣ ଛାତ୍ର ଅନ୍ୟମାନଙ୍କୁ ନ ଜଣାଇ ସମୁଦ୍ରରେ ଗାଧୋଇବାକୁ ଚାଲି ଯାଇଥିଲେ। ଅସାବଧାନତା ଯୋଗୁଁ ସୋମନାଥ ପରିଡ଼ା ସମୁଦ୍ରରେ ଭାସି ଯାଇଥିଲେ। ସେଠାରେ ଥିବା ମତ୍ସ୍ୟଜୀବୀମାନେ ତାଙ୍କୁ ଉଦ୍ଧାର କରିଥିଲେ । ସ୍ଵାସ୍ଥ୍ୟାବସ୍ଥା ଗୁରୁତର ଥିବାରୁ ତାଙ୍କୁ ଆମ୍ବୁଲେନ୍ସ ଯୋଗେ ବ୍ରହ୍ମପୁର ବଡ଼ ମେଡିକାଲକୁ ନିଆଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ଅଧ୍ୟାପକ ବନୋଜ କୁମାର ଦେହୁରୀ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପ୍ରକାରେ ପୁଲିସ ଏକ ଅପମୃତ୍ୟୁ ମାମଲା(ନଂ.୧/୨୫) ରୁଜୁ କରି ତଦନ୍ତ କରୁଥିବା ଜଣାପଡ଼ିଛି। ଖବର ପାଇ ମୃତ ସୋମନାଥଙ୍କ ପରିବାର ଲୋକେ ମେଡିକାଲରେ ପହଞ୍ଚିଥିବା ଜଣାପଡିଛି। ଶନିବାର ମୃତଦେହ ବ୍ୟବଚ୍ଛେଦ ହେବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୁଲିସ ସୂଚନା ଦେଇଛି।